सलामीवीर जोस बटलरच्या फटकेबाजीच्या जोरावर राजस्थान रॉयल्स संघाने इंडियन प्रीमियर लीगमध्ये (आयपीएल) मुंबई इंडियन्सचा ७ विकेट राखून पराभव केला. या पराभवामुळे मुंबईचे बाद फेरीचे गणित बिघडले असून राजस्थान मात्र या शर्यतीत अजूनही टिकून आहे. मुंबईने दिलेले १६९ धावांचे आव्हान राजस्थानने १८ षटकांत पूर्ण केले.
राजस्थानची सुरुवात खराब झाली. सलामीवीर डार्सी शॉट अवघ्या ९ धावांवर तंबूत परतला. त्यानंतर, बटलर आणि कर्णधार अजिंक्य रहाणे यांनी दुसऱ्या विकेटसाठी ९५ धावांची भागीदारी करत संघाचा डाव सावरला. रहाणे ३७ धावांवर बाद झाल्यानंतरही बटलरने एक बाजू लावून धरत आपल्या संघाला विजयी केले. त्याने ५३ चेंडूत ९ चौकार व ५ षटकारांसह नाबाद ९४ धावा केल्या. संजू सॅम्सनने त्याला १४ चेंडूंत २६ धावा करून चांगली साथ दिली. हार्दिक पंडय़ाने दोन गडी बाद केले.
त्याआधी, प्रथम फलंदाजी करताना मुंबईने एविन लेविस (६० धावा) आणि हार्दिक पंडय़ाच्या (३६) उपयुक्त खेळीमुळे सन्मानजनक धावसंख्या उभारली. लेविसने सूर्यकुमार यादवसोबत (३८) पहिल्या विकेटसाठी ८७ धावांची भागीदारी केली. मात्र, यादव व रोहित शर्मा सलग चेंडूंवर बाद झाल्याने मुंबईचा संघ अडचणीत सापडला. अखेरच्या षटकांत धावगती वाढवण्याच्या प्रयत्नात मुंबईने सातत्याने बळी गमावले.
संक्षिप्त धावफलक
मुंबई इंडियन्स : २० षटकांत ६ बाद १६८ (एविन लेविस ६०, हार्दिक पंडय़ा ३६; जोफ्रा आर्चर २/१६) पराभूत वि. राजस्थान रॉयल्स : १८ षटकांत ३ बाद १७१ (जोस बटलर ९४*, अजिंक्य रहाणे ३७; हार्दिक पंडय़ा २/५२).
