नवी मुंबई : नेरूळ सेक्टर सहा परिसरात कबुतरांना खाद्य टाकणाऱ्या दोन ठिकाणांवर महापालिकेने माहिती फलक लावण्याची मागणी राष्ट्रवादी कॉंग्रेस शरद पवार गटाचे नवी मुंबई जिल्हा उपाध्यक्ष महादेव पवार यांनी महापालिका आयुक्त डॉ. कैलाश शिंदे यांच्याकडे केली आहे.
सध्या महापालिका प्रशासनाकडून नवी मुंबईत ठिकठिकाणी कबुतरखाणे असणाऱ्या तसेच कबुतरांना जिथे खाद्य टाकले जाते, त्या ठिकाणी मार्गदर्शनपर सूचना फलक लावण्यात आले आहेत. त्याबद्दल सर्वप्रथम आपले व महापालिका प्रशासनाचे महादेव पवार यांनी आभार मानले आहेत.
नेरूळ सेक्टर सहामध्ये वरुणा व हिमालय सोसायटीच्या मध्यभागी असणाऱ्या छोटेखानी मैदानावर दररोज सभोवतालच्या भागातील व्यावसायिक धान्य आणून टाकतात. त्यांना अनेकदा सांगूनही त्यांना गांभिर्य समजत नाही. आपण त्या ठिकाणी महापालिका प्रशासनाचा मार्गदर्शनपर सूचनाफलक लावणे आवश्यक आहे. तसेच मेरेडियन टॉवर व शिवालिक सोसायटीच्या समोर आणि प्लॉट १५ वरील सिडकोची शिवम सोसायटी व सागरदीप सोसायटीच्या मध्यभागी महावितरणची विद्युत डीपी आहे. त्या ठिकाणी देखील कबुतरांना धान्य टाकले जाते. याही ठिकाणी कबुतरविषयक मार्गदर्शनपर फलक महापालिका प्रशासनाने लावणे आवश्यक आहे. सकाळच्या वेळी येथे मोठ्या प्रमाणावर कबुतरे असतात. आपण या दोन ठिकाणी कबुतरविषयक मार्गदर्शनपर फलक लावणे आवश्यक आहे. समस्येचे गांभीर्य व स्थानिकांची मागणी लक्षात घेता या दोन ठिकाणी कबुतरविषयक मार्गदर्शनपर सूचना फलक लावण्याचे संबंधितांना निर्देश देण्याची मागणी महादेव पवार यांनी केली आहे.
