‘सेल्फी’साठी शिवसैनिकाना नार्वेकरंच हवेत

दिपक देशमुख
मुंबई : शिवसेना पक्षप्रमुख उद्धव ठाकरे आणि युवासेना प्रमुख आदित्य ठाकरे यांच्यावर जीव ओवाळून टाकणारा शिवसैनिक सध्या शिवसेनेतील आणखी एका नेत्याच्या प्रेमात पडला आहे. हा नेता दुसरा-तिसरा कोणी नसून उद्धव ठाकरे यांचे सहकारी आणि शिवसेना सचिव मिलिंद नार्वेकर हे आहेत. शिवसेनेच्या वर्धापन दिनी नार्वेकर यांच्यासोबत सेल्फी काढण्यासाठी शिवसैनिकांनी एकच गर्दी केल्याने नार्वेकर यांचे सेनेतील महत्त्व पुन्हा एकदा अधोरेखित झाले आहे.
गोरेगावच्या नेस्को संकुलात मंगळवारी शिवसेनेचा ५२ वा वर्धापन दिन दिमाखात पार पडला. वर्धापन दिनानिमित्त दिवसभर कार्यकर्ता-पदाधिकार्‍यांचे शिबीरही पार पडले. यावेळी लोकप्रतिनिधी, पदाधिकारी आणि शिवसैनिक मोठ्या प्रमाणावर उपस्थित होते. या शिबिराला उद्धव ठाकरे, आदित्य ठाकरे आणि मनोहर जोशींसहीत अनेक ज्येष्ठ नेत्यांनी मार्गदर्शन केले. मात्र या सोहळ्याचे मुख्य आकर्षण राहिले ते मिलिंद नार्वेकर. मिलिंद नार्वेकर यांचं कार्यक्रमस्थळी आगमन होताच शिवसैनिकांनी त्यांच्या भोवती एकच गराडा घातला. त्यांच्याशी हस्तांदोलन करतानाच त्यांच्यासोबत सेल्फी काढण्यासाठी शिवसैनिकांमध्ये एकच चढाओढ सुरू झाली. नार्वेकरांनीही शिवसैनिकांना फोटो काढू दिले. शिवसैनिकांनी सेल्फीसाठी नार्वेकरांना घेरलेले पाहून शिवसेनेचे इतर पदाधिकारी आणि लोकप्रतिनिधींमध्ये चांगलीच कुजबूज रंगली होती.