नवी मुंबई : नेरुळ सेक्टर २८ (जुना) व सेक्टर ३० (नवीन) परिसरात वाढलेल्या व्यसनाधीनांच्या उपद्रव, अस्वच्छता व सुरक्षेच्या प्रश्नांवर तात्काळ कारवाई करण्याची लेखी सिडकोचे माजी संचालक नामदेव भगत यांनी महापालिका आयुक्त, नवी मुंबई पोलीस आयुक्त, नेरूळ पोलीस ठाण्याचे वरिष्ठ पोलीस निरीक्षक यांच्याकडे केली आहे.
जुना सेक्टर २८ तसेच नवीन सेक्टर ३० या परिसरातील मोकळ्या भूखंडांमध्ये सध्या मोठ्या प्रमाणात व्यसनाधीन व्यक्तींचा वावर वाढलेला असून, गांजा सेवन, दारू पिणे, तसेच इतर बेकायदेशीर कृत्ये उघडपणे सुरु आहेत. यामुळे परिसरातील कायदा व सुव्यवस्थेचा प्रश्न निर्माण झाला आहे. या भागातील महिला, तरुणी, विद्यार्थी व ज्येष्ठ नागरिक यांना सतत भीती व असुरक्षिततेची भावना निर्माण होत आहे. काही वेळा रात्रीच्या वेळी आरडाओरडा, भांडणे, संशयास्पद हालचाली दिसून येतात, ज्यामुळे नागरिकांच्या दैनंदिन जीवनावर परिणाम होत आहे. तसेच या ठिकाणी दारूच्या रिकाम्या बाटल्या, सिगारेटचे थोटके, प्लास्टिक कचरा मोठ्या प्रमाणात साचलेला असून परिसर अत्यंत अस्वच्छ झाला आहे. यामुळे डासांची वाढ, दुर्गंधी आणि आरोग्यविषयक समस्या निर्माण होण्याची शक्यता आहे. हे सर्व नवी मुंबई महापालिकेच्या स्वच्छता व सुशोभीकरणाच्या प्रतिमेला धक्का देणारे आहे. तसेच संबंधित भूखंडांचा काही ठिकाणी अनधिकृत वापर, अतिक्रमण व संशयास्पद हालचाली सुरु असल्याचेही निदर्शनास येत असल्याचे नामदेव भगत यांनी निवेदनात म्हटले आहे.
या बाबी भविष्यात मोठ्या गुन्हेगारी घटनांना आमंत्रण देऊ शकतात. त्यामुळे नेरुळ पोलीस स्टेशनमार्फत नियमित गस्त वाढवून व्यसनाधीन व बेकायदेशीर कृत्यांवर कडक कारवाई करावी, संबंधित भूखंडांची तत्काळ स्वच्छता मोहीम राबवून कचरा हटविणे, परिसरात सीसीटीव्ही कॅमेरे बसवून देखरेख वाढविणे, अंधार असलेल्या ठिकाणी स्ट्रीट लाईट्स बसविणे/दुरुस्ती करणे, मोकळ्या भूखंडांना फेन्सिंग करून अनधिकृत प्रवेश रोखणे, “No Trespassing / व्यसनमुक्त परिसर” असे सूचना फलक लावणे. महानगरपालिका व पोलीस प्रशासनाच्या संयुक्त विद्यमाने विशेष मोहिम राबवून परिसर पूर्णपणे सुरक्षित करणे. आवश्यक असल्यास महिला सुरक्षा पथकाची नेमणूक करणे अशा मागण्या करताना नामदेव भगत यांनी या गंभीर समस्येकडे तात्काळ लक्ष देऊन योग्य ती कठोर कारवाई करावी अशी मागणी केली आहे. सोबतच अन्यथा नागरिकांमध्ये असंतोष वाढण्याची शक्यता आहे, असा इशाराही त्यांनी दिला आहे.
