सारसोळेतील आरोग्यवर्धिनी केंद्राच्या मुद्द्यावरून प्रशासनाला सवाल; निखिल मांडवे यांचे आयुक्तांना निवेदन
नवी मुंबई : नवी मुंबईतील दिव्यांग बांधवांच्या उपजीविकेचा प्रश्न मार्गी लावण्यासाठी त्यांना व्यवसायाकरिता स्टॉल उभारण्यास सिडकोचे भूखंड उपलब्ध करून द्यावेत, अशी मागणी युवा सेनेचे नवी मुंबई जिल्हा सरचिटणीस निखिल रतन मांडवे यांनी केली आहे. यासंदर्भात त्यांनी नवी मुंबई महानगरपालिकेचे आयुक्त डॉ. कैलास शिंदे यांना निवेदन देऊन दिव्यांगांच्या रोजगाराचा प्रश्न तातडीने सोडविण्याची मागणी केली आहे.
नवी मुंबईतील अनेक दिव्यांग व्यक्तींना उपजीविकेसाठी व्यवसाय करण्याची इच्छा असली, तरी स्टॉल सुरू करण्यासाठी आवश्यक जागा उपलब्ध नसल्याने त्यांच्यासमोर आर्थिक अडचणी निर्माण होत असल्याचे मांडवे यांनी निवेदनात नमूद केले आहे. दिव्यांगांना स्वावलंबी होण्यासाठी प्रशासनाने ठोस उपाययोजना करणे आवश्यक असल्याचेही त्यांनी म्हटले आहे.
निवेदनात निखिल मांडवे यांनी सारसोळे गावातील प्लॉट क्रमांक २८१ चा उल्लेख केला आहे. सिडकोकडून भूखंड हस्तांतरित होण्यापूर्वीच या जागेवर महापालिकेने अतिक्रमण करून शहरी आरोग्यवर्धिनी केंद्र उभारल्याचा दावा त्यांनी केला आहे. आरोग्यविषयक सुविधांसाठी भूखंडाचा वापर केला जात असेल, तर दिव्यांगांच्या उपजीविकेचा प्रश्न सोडविण्यासाठीही प्रशासनाने तत्परता दाखवावी, अशी भूमिका त्यांनी मांडली.
दिव्यांगांना केवळ आश्वासन नको, तर स्वावलंबी होण्यासाठी हक्काची जागा मिळावी, अशी मागणी करत सिडकोच्या मोक्याच्या ठिकाणी असलेल्या भूखंडांवर स्टॉल उभारण्यासाठी जागा उपलब्ध करून देण्याबाबत महापालिका आयुक्तांनी तातडीने निर्णय घ्यावा, असे आवाहन मांडवे यांनी केले आहे. दिव्यांगांना रोजगाराच्या संधी उपलब्ध करून देण्यासाठी प्रशासन कोणती भूमिका घेते, याकडे आता लक्ष लागले आहे.