रहीवाशांनी पाठलाग करून केले भुरट्या चोराला जेरबंद

नवी मुंबई : दुपारच्या शांततेचा फायदा उचलत कटावणी तोडत बंद घरे लुटणार्‍या एका भुरट्या चोराला सारसोळेच्या ग्रामस्थांनी पाठलाग करून जेरबंद केले. ही घटना बुधवारी दुपारी 4च्या सुमारास घडली असून चोराजवळ पाकीटात नोटांचा बंडल, एक मोठी कटावणी व चार ते पाच मोबाईल सापडले आहेत. सारसोळे गावातील घरक्रमांक 157 वरील दर्शन अपार्टमेंटमधील दोन घरे काही दिवसापूर्वीच लुटण्यात आली असून आजही त्याच बिल्डींगमध्ये हा भुरटा चोर आला असता त्याचा पाठलाग करून सारसोळेच्या ग्रामस्थांनी जेरबंद केले.
दर्शन अपार्टमेंटमध्ये काही घरांना कडी लावून दुसर्‍या मजल्यावरील घर फोडण्याच्या तयारीत हा चोरटा असतानाच बिल्डींगमधील काही लोकांना चाहूल लागली. तिसर्‍या मजल्यावरील रहीवाशी दुसर्‍या मजल्यावर येत असल्याचे पाहून चोरट्याने धूम ठोकली. रहीवाशांनी बराच वेळ पाठलाग करून त्यास जेरबंद करून सोसायटीच्या ठिकाणी त्याला आणले. त्याची झडती घेतली असता खिशात मोठी कटावणी, नोटाचा बंडल आणि चार ते पाच मोबाईल सापडले. चोरट्यास सामूहिक मार पडल्यावर त्याने आपण कल्याण येथे रहात असल्याचे सांगितले. चोरटा हिंदी भाषिक असून ग्रामस्थांनी नेरूळ पोलिसांशी संपर्क साधला आहे. हा चोरटा सापडल्याने व त्याजवळील कटावणी पाहता या परिसरातील अनेक गुन्हे आता उघड होण्याची शक्यता रहीवाशांकडून व्यक्त केली जात आहे. यावेळी ग्रामस्थांसमवेत कोलवाणी माता मित्र मंडळाचे अध्यक्ष मनोज मेेहेर हे उपस्थित होते.