काँग्रेस शिष्टमंडळ नाणार आणि परिसराचा दौरा करून स्थानिकांशी संवाद साधणार
मुंबई :- नाणार रिफायनरीला स्थानिकांचा प्रचंड विरोध आहे. स्थानिकांना विश्वासात घेतल्याशिवाय सरकारने प्रकल्प रेटून नेण्याचा प्रयत्न करू नये. काँग्रेस पक्ष स्थानिकांसोबत असून काँग्रेस पक्षाचे शिष्टमंडळ १९ एप्रिल पासून नाणार आणि परिसराचा दौरा करून स्थानिकांशी संवाद साधणार असे आश्वासन महाराष्ट्र प्रदेश काँग्रेस कमिटीचे अध्यक्ष खा. अशोक चव्हाण यांनी नाणार रिफायनरी विरोधी संघर्ष समितीच्या शिष्टमंडळाला दिले.
आज अशोक दादा वालम यांच्या नेतृत्वाखालील कोकण रिफायनरी विरोधी संघर्ष समितीच्या शिष्टमंडळाने टिळक भवन, दादर येथे काँग्रेस प्रदेशाध्यक्षांची भेट घेऊन चर्चा केली. यावेळी काँग्रेस पक्ष स्थानिकांसोबत असल्याचे आश्वासन काँग्रेस प्रदेशाध्यक्षांनी त्यांना दिले. त्यानंतर पत्रकारांशी बोलताना खा. चव्हाण म्हणाले की, नाणार रिफायनरी प्रकल्पासाठी संपादीत केल्या जाणा-या जमिनीवर आंबा आणि काजूची लाखो झाडे आहेत. या प्रकल्पामुळे या भागातील शेतक-यांची सुपीक जमीन जाणार असून त्यांच्या उपजीविकेचा प्रश्न निर्माण होणार आहे. या प्रकल्पामुळे होणा-या प्रदूषणामुळे पर्यावरणाची गंभीर समस्या निर्माण होणार आहे अशी भिती स्थानिकांनी व्यक्त केली आहे. या प्रकल्पाविरोधात स्थानिकांमध्ये प्रचंड असंतोष असून सरकारने त्याची दखल घ्यावी. स्थानिकांचा विरोध डावलून प्रकल्प रेटण्याचा प्रयत्न करू नये. स्थानिकांशी चर्चा करून त्यांचे प्रश्न समजून घेऊनच सरकारने पुढची पावले टाकावीत असे खा. चव्हाण म्हणाले.
नाणार प्रकल्पाबाबत शिवसेनेची भूमिका दुटप्पी आहे. शिवसेनेचा प्रकल्पाला विरोध असेल तर प्रकल्पाच्या जमीन संपादनासाठी एमआयडीसीने काढलेले परिपत्रक रद्द करावे अन्यथा सरकारमधून बाहेर पडावे असे काँग्रेस प्रदेशाध्यक्ष म्हणाले.
