मुंबई : कर्नाटकमधील भाजपच्या राजकीय कारस्थानांमध्ये तूर्तास ‘लोटस’ जिंकले असेल. पण लोकशाही हरली, हे दुर्दैव असल्याचे माजी मुख्यमंत्री अशोक चव्हाण यांनी म्हटले आहे.
कर्नाटक विधानसभेमध्ये विश्वास प्रस्तावावर मतदान झाल्यानंतर प्रतिक्रिया व्यक्त करताना अशोक चव्हाण म्हणाले की, कर्नाटकमध्ये काँग्रेस आणि जेडीएसचे सरकार आल्यानंतर अगदी पहिल्या दिवसापासून भाजपने हे सरकार पाडण्यासाठी कट-कारस्थाने सुरू केली होती. सत्ता हवी तर आमचीच, हा एकमेव अट्टाहास त्यामागे होता. त्यासाठी त्यांना केंद्रातील अमर्याद सत्ता आणि पैशाचा मनमुराद वापर केला. नैतिकता धाब्यावर बसवली गेली. काँग्रेस-जेडीएसच्या आमदारांना अनेक प्रलोभने दिली. सरतेशेवटी कर्नाटकमध्ये सरकार कोसळले व लोकशाहीचा पराभव झाला. हा प्रकार अतिशय दुर्दैवी असल्याचेही त्यांनी सांगितले.
