नवी मुंबई : महाराष्ट्र शासनामार्फत कोरोना संसर्गाचा प्रादुर्भाव रोखण्यासाठी ४ एप्रिल रोजी ‘ब्रेक द चेन’ चा आदेश निर्गमित करताना विविध क्षेत्रात काम करणाऱ्या कर्मचाऱ्यांसाठी आरटीपीसीआर चाचणी अनिवार्य केली होती. त्यामध्ये सुधारणा करीत आता १० एप्रिलपासून ॲन्टीजन चाचणीही ग्राह्य धरण्यात येणार आहे. तशा प्रकारच्या सुधारणांचे आदेश शासनाच्या आपत्ती व्यवस्थापन, मदत तथा पुनर्वसन विभागामार्फत निर्गमित करण्यात आलेले आहेत.
या आदेशानुसार, राज्यात कोरोनाचा प्रादुर्भाव वाढत असल्याने शासनाला ‘ब्रेक द चेन’ घोषित करून काही निर्बंध लावावे लागले. यामध्ये कोरोना लस न घेणाऱ्या कर्मचाऱ्यांसाठी आरटीपीसीआर चाचणी करणे अनिवार्य करण्यात आले होते. तसेच त्याची वैधता पंधरा दिवस ठरविण्यात आली आहे.. यामध्ये सुधारणा करण्यात आली असून १० एप्रिलपासून आरटीपीसीआर चाचणीला पर्याय म्हणून रॅपिड टेस्ट चाचणीही ग्राह्य धरण्यात येणार आहे.
यामध्ये सार्वजनिक वाहतूक, खाजगी वाहतूक, चित्रपट, जाहिरात आणि चित्रवाणी मालिकांसाठी चित्रीकरण करणारे कर्मचारी, होम डिलिव्हरी सेवेमधील कर्मचारी, परीक्षा कार्यातील सगळे कर्मचारी व अधिकारी, लग्न समारंभातील कर्मचारी, अंतिम संस्कार करणारे कर्मचारी, खाद्य विक्री करणारे लोक, इतर कर्मचारी, कारखान्यातील कामगार, ई-कॉमर्स मधील व्यक्ती, बांधकाम क्षेत्रातील कर्मचारी आदींचा समावेश आहे.
