नवी मुंबई : पेट्रोल, डिझेल व गॅस दरवाढीच्या निषेधार्थ नेरूळ तालुका ब्लॉक काँग्रेसच्या वतीने नेरूळ सेक्टर ६ मधील पेट्रोलपंपावर अभिनव पध्दतीने ‘लॉलीपॉप’ आंदोलन करण्यात आले.
पामबीच मार्गालगत असलेल्या नेरूळ सेक्टर ६ मधील पेट्रोलपंपावर सोमवारी सकाळी नेरूळ तालुका ब्लॉक काँग्रेसचे अध्यक्ष रवींद्र सावंत यांच्या नेतृत्वाखाली हे आंदोलन करण्यात आले. पेट्रोलपंपावर इंधन भरण्यासाठी आलेल्या चालकांना यावेळी काँग्रेसच्या आंदोलनकर्त्याकडून ‘लॉलीपॉप’ चॉकलेट देण्यात आले. यावेळी केंद्र सरकारकडून सातत्याने होणाऱ्या इंधन दरवाढीच्या निषेधार्थ ‘अच्छे दिन’च्या उपहासात्मक घोषणाही देण्यात आल्या. यावेळी आंदोलनात काँग्रेसचे नेते संतोष शेट्टी, काँग्रेसच्या नवी मुंबई जिल्हा सचिव विद्या भांडेकर, तालुका उपाध्यक्ष दिनेश गवळी, शेवंता मोरे, प्रभाग ८५ चे काँग्रेस वॉर्ड अध्यक्ष हितेश (किशोर) तांबे, ताळेकर, माने सहभागी झाले होते.
