Navimumbaiilive.com@gmail.com : ८३६९९२४६४६
नवी मुंबई : अपघाताला व साथीच्या आजाराला खतपाणी घालणारे नेरूळ सेक्टर २ मधील रस्त्यावरील खड्डे त्वरीत बुजविण्याची मागणी नवी मुंबई जिल्हा कॉंग्रेसच्या सचिव विद्या भांडेकर यांनी महापालिका आयुक्त अभिजित बांगर यांच्याकडे एका लेखी निवेदनातून केली आहे.
सध्या पावसाळा हंगाम असून गेल्या काही दिवसापासून संततधार पाऊस सुरू आहे. नेरूळ सेक्टर दोनमधील रस्त्यावर मोठ्या प्रमाणावर खड्डे पडले आहेत. यामुळे अपघात होवू लागले आहेत. खड्ड्यामध्ये पाणी साचल्याने दुचाकी वाहनचालकांना खड्ड्याचा अंदाज येत नाही. वाहने घसरत असून वाहनचालकांनाही दुखापती झाल्या आहेत. खड्ड्यातून वाहन गेल्यास पदपथावरून ये-जा करणाऱ्या पादचाऱ्यांच्या अंगावर पाणी उडत असून त्यांचेही कपडे व शरीर खराब होत आहे. रस्त्यावरील खड्ड्यात पाणी साचत असल्याने रस्त्यालगतच्या गृहनिर्माण सोसायट्यांना काही दिवसांपासून डासांचा त्रासही सहन करावा लागत आहे. त्यामुळे रस्त्यावरील खड्डे साथीच्या आजाराला व अपघातांना निमत्रंणच नाहीतर मदत कऱत असल्याने तात्काळ संबंधितांना नेरूळ सेक्टर २ मधील रस्त्यावरील खड्डे बुजविण्याचे आदेश देण्याची मागणी विद्या भांडेकर यांनी महापालिका प्रशासनाकडे केली आहे.
