जयेश खांडगेपाटील : Navimumbailive.com@gmail.com
नवी मुंबई : कामावर येताना अपघात झालेल्या अमर सावंत या ठोक मानधनावरील कर्मचाऱ्याचा उपचार खर्च महापालिका प्रशासनाने करण्याची मागणी महाराष्ट्र कर्मचारी युनियनचे अध्यक्ष रविंद्र सावंत यांनी महापालिका आयुक्तांकडे एका निवेदनातून केली आहे.
महापालिका प्रशासनामध्ये समाज विकास विभागामध्ये ठोक मानधनावर काम करणारे कर्मचारी अमर सावंत हे बुधवारी, दि. २५ जून २०२५ रोजी अमर कामावर येत असताना अपघात झाला असून उपचारासाठी त्यास अपोलो रुग्णालयात दाखल करण्यात आले आहे. अमर सावंत यांच्या घरची परिस्थिती हलाखीची असून घरात तो एकटाच कमविता आहे. या कर्मचाऱ्यावर अपघातामुळे शस्त्रक्रिया करावी लागणार असून महागड्या शस्त्रक्रियेचा खर्च त्यांच्या आवाक्याबाहेरचा आहे. भविष्यात आपली सेवा कायम होईल या आशेने अमर सावंत गेली काही वर्षे प्रशासनात प्रामाणिकपणे काम करत आहेत. आज अमर सावंत सारख्या अनेक कर्मचाऱ्यांची पालिका प्रशासनात हीच परिस्थिती आहे. या सर्वच कर्मचाऱ्यांचे आज भविष्य अंधारात आहे. महापालिका प्रशासनाकडून या कर्मचाऱ्यांचे आर्थिक शोषण होत असल्याचे रविंद्र सावंत यांनी निवेदनात म्हटले आहे.
अमर सावंत या कर्मचाऱ्यांच्या उपचाराचा खर्च पालिका प्रशासनाने करणे आवश्यक आहे. कर्मचाऱ्याला कामावर येताना अपघात झाला असल्याने त्याच्या उपचाराचा खर्च पालिका प्रशासनाने करणे आवश्यक आहे. पालिका प्रशासनाने अपघातग्रस्त अमर सावंत यांना वाऱ्यावर न सोडता त्यांच्या उपचाराचा सर्व खर्च करण्यासाठी पालिका प्रशासनातील संबंधितांना तातडीने निर्देश देण्याची मागणी रविंद्र सावंत यांनी महापालिका प्रशासनाकडे केली आहे.
