नवी मुंबई : भाजपकडून सानपाडा परिसरात लावण्यात येणाऱ्या दहीहंडीचे मुंबई, नवी मुंबई, ठाणे, उरण, पनवेल परिसरातील गोविंदा पथकांना कमालीचे आकर्षण असते. यंदाही सानपाडा सेक्टर 8 परिसरात भाजपकडून आयोजित केल्या जाणाऱ्या दहीहंडी उत्सवाचा आनंद नवी मुंबईकरांना घ्यावयास मिळणार आहे.
सानपाडा सेक्टर आठमधील हुतात्मा बाबू गेनू मैदानावर भारतीय जनता युवा मोर्चाचे माजी नवी मुंबई जिल्हा उपाध्यक्ष व अखिल भारतीय माथाडी संघटनेचे नवी मुंबई जिल्हा अध्यक्ष पांडुरंग आमले हे साईभक्त सेवा मंडळाच्या व भाजप सानपाडा विभाग याच्या माध्यमातून श्रीकृष्ण जन्माष्टमी व दहीहंडी सोहळ्याचे गेली पाच वर्षे आयोजन करत असतात. गेल्या वर्षी या दहीहंडी उत्सवामध्ये मुंबई, ठाणे, नवी मुंबईतील 140 हून अधिक गोविंदा पथके सहभागी झाली होती. यंदाच्या दहीहंडी उत्सवात 5 लाख 55 हजार 555 रुपयांची रोख बक्षिसे व अन्य बक्षिसे साहित्य स्वरुपात ठेवण्यात आली असल्याची माहिती भाजपचे पदाधिकारी पांडुरंग आमले यांनी दिली.
भाजपच्या बेलापूरच्या आमदार सौ. मंदाताई म्हात्रे आणि भाजपचे बेलापूर विधानसभा संयोजक निलेश म्हात्रे यांच्यासह भाजपचे पदाधिकारी या उत्सवात सहभागी होत असतात. नवी मुंबईत लाखोंची बक्षिसे असणाऱ्या या दहीहंडी उत्सवाचा थरार पाहण्यासाठी नवी मुंबईकर मोठ्या संख्येने सहभागी होत असतात. या उत्सवात नवी मुंबईकरांनी मोठ्या संख्येने सहभागी व्हावे असे आवाहन कार्यक्रमाचे आयोजक पांडुरंग आमले यांनी केले आहे.
सानपाडा येथे शनिवारी भाजपच्या दहीहंडीचा जल्लोष
