नवी मुंबई : नेरूळ सेक्टर सहा, सारसोळे गावात गेल्या दोन ते तीन दिवसापासून होत असलेल्या कमी दाबाच्या पाणीपुरवठ्याच्या समस्येचे तातडीने निवारण करण्याची मागणी राष्ट्रवादी कॉंग्रेस शरद पवार गटाचे नवी मुंबई जिल्हा उपाध्यक्ष महादेव पवार यांनी महापालिका आयुक्त कैलाश शिंदे यांच्याकडे एका लेखी निवेदनातून केली आहे.
गेल्या दोन ते तीन दिवसांपासून नेरूळ सेक्टर सहा, सारसोळे गाव या परिसरात पाणी कमी दाबाने येत आहे. सध्या दिवाळी सुरु असून ऐन दिवाळीत सेक्टर सहाच्या रहिवाशांना व सारसोळे गावच्या ग्रामस्थांना पाणी समस्येचा सामना करावा लागत आहे. पाणी कमी दाबाने येत असल्याने रहीवाशांना विशेषत: महिला वर्गाला याचा त्रास सहन करावा लागत आहे. कमी पाणीपुरवठ्याच्या समस्येचे निवारण करण्याचे संबंधितांना निर्देश देवून सारसोळेच्या ग्रामस्थांना व सेक्टर सहाच्या रहिवाशांना दिलासा देण्याची मागणी महादेव पवार यांनी महापालिका आयुक्तांकडे केली आहे.
