ठाणे (प्रतिनिधी) : ठाणे महापालिका निवडणुकीतील विजयानंतर ऑल इंडिया मजलिस-ए-इत्तेहादुल मुस्लिमीन ( एआयएमआयएम) पक्षाच्या नगरसेविका सहर शेख यांनी “कैसा हराया, अभी हम लोगो को मुंब्रा को पुरा हरा कर देना है” असे वक्तव्य केले होते. या प्रकरणी भाजप नेते किरीट सोमय्या, आमदार निरंजन डावखरे यांच्यासह बजरंग दल, विश्व हिंदू परिषद यांनी पोलिसांकडे तक्रारी दाखल केल्या होत्या. यानंतर पोलिसांनी केलेल्या चौकशी दरम्यान, सहर शेखने माफीनामा लिहून दिला असून त्याबाबत पोलिसांनी तक्रारदारांना लेखी कळविले आहे. माफिनामा स्वीकारल्यानंतर हे प्रकरण दप्तरी नोंदवण्यात आले आहे.
मुंब्रा शहरातून एआयएमआयएम पक्षाकडून नगरसेवक म्हणून निवडून आलेल्या सहार युनूस शेख या चांगल्याच चर्चेत आल्या. सहर शेख यांच्यासह एआयएमआयएमचे पाच नगरसेवक निवडून आल्याने राष्ट्रवादीचे आमदार जितेंद्र आव्हाड यांना हा धक्का मनाला जातो. या विजयानंतर भाषण करताना शेख यांनी “कैसा हराया, अभी हमलोगो को मुंब्रा को पुरा हरा कर देना है” असे वक्तव्य करत आव्हाडांना डिवचले होते. त्यांच्या या भाषणावर सर्वत्र विविध प्रतिक्रिया उमटत आहे. या प्रकरणी भाजप नेते किरीट सोमय्या, आमदार निरंजन डावखरे यांच्यासह बजरंग दल, विश्व हिंदू परिषद यांनी पोलिसांकडे तक्रारी दाखल केल्या होत्या. यानंतर पोलिसांनी सहार शेख यांना नोटीस बजावली. त्यामुळे त्यांच्या अडचणीत वाढ झाली होती.
भाजप नेते किरीट सोमय्या यांनी मुंब्रा पोलीस ठाण्याचे वरिष्ठ पोलीस निरीक्षक अनिल शिंदे यांची भेट घेऊन चौकशीबाबत विचारणा केली. त्यावेळी शिंदे यांनी सहर शेखच्या चौकशीचा अहवाल सादर केला.
“अभी हम लोगो को मुंब्रा को पुरा हरा कर देना है” या वक्तव्याबद्दल तिने २३ जानेवारी २०२६ रोजी माफीनामा दिला आहे, असे शिंदे यांनी लिखित स्वरूपात दिले.
मुंब्रा येथे झालेल्या सभेत वापरलेले वाक्य हे पक्षाच्या झेंडा आणि निशाणीच्या संदर्भात होते. कोणाचेही मन दुखावण्याचा किंवा सामाजिक वातावरण बिघडवण्याचा हेतू नव्हता, “तिरंग्यासाठी जगू आणि तिरंग्यासाठीच मरणार” आहोत. वक्तव्यामुळे कोणाच्या भावना दुखावल्या असतील तर त्यांची जाहीर आणि लेखी स्वरूपात माफी मागते, असे तिने म्हटले आहे. माफिनामा स्वीकारल्यानंतर हे प्रकरण दप्तरी नोंदवण्यात आले आहे. भविष्यात अशा प्रकारचे वक्तव्य झाल्यास संबंधितांवर कायदेशीर कारवाई केली जाईल, अशी तजवीज पोलिसांनी ठेवली आहे, अशी माहिती वरिष्ठ पोलीस निरीक्षक अनिल शिंदे यांनी सोमय्या यांना लिखित स्वरूपात दिली आहे.
