नवी मुंबई : नेरूळ सेक्टर सहा परिसरात राजीव गांधी उड्डाणपुल ते पामबीच मार्गाकडे जाणाऱ्या मार्गालगतच्या विशाल सोफा आर्ट ते नेरूळ सिव्ह्यू सोसायटीपर्यतच्या पदपथावर सुरु असलेल्या कामाच्या गुणवत्तेची चौकशी करण्याची मागणी शिवसेनेचे महादेव पवार यांनी महापालिका आयुक्त कैलाश शिंदे यांच्याकडे एका लेखी निवेदनातून केली आहे.
नेरूळ सेक्टर सहा परिसरात राजीव गांधी उड्डाणपुल ते पामबीच मार्गाकडे जाणाऱ्या मार्गालगतच्या विशाल सोफा आर्ट ते नेरूळ सिव्ह्यू सोसायटीपर्यतच्या पदपथावर सुरु असलेल्या कामाबाबत कोठेही या ठिकाणी कामाबाबतचा माहिती फलक लावण्यात आलेला नाही. वास्तविकपणे कामाच्या ठिकाणी कामाबाबतचा माहिती फलक लावणे आवश्यक आहे. त्यामुळे पदपथावर सुरु असलेल्या कामाबाबत स्थानिक जनतेला कामाचे स्वरुप, कामाचा कालावधी, कामाचा निधी माहिती असणे आवश्यक आहे. विशेष म्हणजे सध्या सुरु असलेल्या कामाच्या दर्जाबाबत गुणवत्तेची तपासणी पालिका प्रशासनाकडून होणे आवश्यक आहे. पदपथावर सुरु असलेल्या नवीन कामाला आताच तडे (क्रॅक) गेले आहेत. पदपथाच्या कामासाठी कंत्राटदाराने त्या ठिकाणी ठेवलेल्या पाण्याच्या टाकीत कचरा पडला आहे. त्या ठिकाणी पाण्याची दुर्गंधी येत आहे. डासाचा त्रास स्थानिक रहिवाशांना होत आहे. साथीच्या आजाराबाबत स्थानिक रहिवाशांकडून भीती व्यक्त करण्यात येत आहे.
आपण स्वत: या ठिकाणी येवून या कामाबाबत पाहणी अभियान राबविल्यास आपणास समस्येचे गांभीर्य निदर्शनास येईल व निवेदनामागील सत्यताही आपणास समजेल. तरी आपण संबंधित अधिकाऱ्यांना त्या ठिकाणी कामाबाबतचा फलक लावण्याचे निर्देश देवून कामाची गुणवत्ता चेक करावी. तसेच पाण्याच्या टाकीच्या स्वच्छतेचे निर्देश देण्याची मागणी महादेव पवार यांनी महापालिका आयुक्तांकडे केली आहे.