महाराष्ट्र कर्मचारी युनियनची मुख्यमंत्र्यांकडे आणि उपमुख्यमंत्री यांच्याकडे मागणी
अनंतकुमार गवई : Navimumbailive.com@gmail.com
नवी मुंबई (प्रतिनिधी) : नेरूळ येथील एल.पी. परिसरात अतिवृष्टीदरम्यान सीसीटीव्हीच्या विद्युत केबलमधून पाण्यात उतरलेल्या विद्युत प्रवाहामुळे दोन शाळकरी विद्यार्थिनींना धक्का बसल्याच्या घटनेत नवी मुंबई महानगरपालिकेच्या विद्युत विभागाचे कार्यकारी अभियंता प्रवीण गाडे यांच्याविरुद्ध दाखल करण्यात आलेला गुन्हा अन्यायकारक असून तो तातडीने रद्द करावा, अशी मागणी महाराष्ट्र कर्मचारी युनियनचे अध्यक्ष रविंद्र सावंत यांनी मुख्यमंत्री तथा गृहमंत्री देवेंद्र फडणवीस, उपमुख्य मंत्री एकनाथ शिंदे यांच्याकडे केली आहे.
मुख्यमंत्री व उपमुख्यमंत्री यांना पाठविलेल्या निवेदनात सावंत यांनी म्हटले आहे की, संबंधित दुर्घटनेनंतर पोलिसांनी प्राथमिक चौकशी पूर्ण होण्यापूर्वीच प्रवीण गाडे यांच्याविरुद्ध गुन्हा दाखल केला. मात्र महानगरपालिकेने पोलिसांना जबाबदारी निश्चित झालेली नसून चौकशी सुरू असल्याचे लेखी कळविले होते. तरीदेखील गाडे यांच्यावर गुन्हा दाखल करण्यात आल्याने या कारवाईवर प्रश्नचिन्ह निर्माण झाले आहे.
संबंधित सीसीटीव्ही यंत्रणेची देखभाल, दुरुस्ती आणि सुरक्षिततेची जबाबदारी कंत्राटदारावर असताना कार्यकारी अभियंता यांच्यावर गुन्हा दाखल करणे योग्य नसल्याचे निवेदनात नमूद करण्यात आले आहे. गेली 26 वर्षे प्रामाणिकपणे सेवा बजावणारे प्रवीण गाडे हे निष्कलंक अधिकारी असून या दुर्घटनेशी त्यांचा थेट संबंध नसल्याचा दावाही करण्यात आला आहे.
या प्रकरणात सखोल आणि निष्पक्ष चौकशी करून प्रत्यक्ष दोषी व्यक्ती, संस्था किंवा कंत्राटदाराविरुद्ध कारवाई करावी तसेच प्रवीण गाडे यांच्याविरुद्ध दाखल करण्यात आलेल्या गुन्ह्याचा पुनर्विचार करून तो रद्द करण्यात यावा, अशी मागणी महाराष्ट्र कर्मचारी युनियनने केली आहे.
तसेच, कोणतीही जबाबदारी निश्चित होण्यापूर्वी गाडे यांच्याविरुद्ध गुन्हा दाखल करण्याची घाई करणाऱ्या संबंधित पोलिस अधिकाऱ्याच्या भूमिकेचीही चौकशी करून आवश्यक असल्यास त्याच्यावर प्रशासकीय कारवाई करावी, अशी मागणीही निवेदनात करण्यात आली आहे. या विषयावर महाराष्ट्र कर्मचारी युनियनचे अध्यक्ष रविंद्र सावंत यांनी उपमुख्यमंत्री एकनाथ शिंदे, नवी मुंबईचे पोलीस आयुक्त, सहाय्यक पोलीस आयुक्त, नेरूळ पोलीस ठाण्याचे वरिष्ठ पोलीस निरीक्षक या सर्वांना स्वतंत्रपणे निवेदन सादर केले आहे.
कर्मचाऱ्यांचा आंदोलनाचा इशारा
पालिका प्रशासनातील प्रविण गाडे या प्रामाणिक अधिकाऱ्यांवर पोलिसांनी कोणत्याही प्रकारची चौकशी न करता थेट गुन्हा दाखल झाल्याने महापालिका कर्मचारी व अधिकाऱ्यांमध्ये संतापाची लाट उसळली आहे. केवळ घटनेचे खापर फोडण्यासाठी गाडे यांना बळीचा बकरा बनविला जात असल्याचा आरोप पालिका अधिकारी व कर्मचारी यांच्याकडून केला जात आहे. याविरोधात रस्त्यावर उतरुन आंदोलन करण्याचा, निदर्शन करण्याचा इशारा कर्मचारी संघटनांकडून दिला जात असल्याने हे प्रकरण चिघळण्याची भीती व्यक्त केली जात आहे.
