अनंतकुमार गवई : Navimumbailive.com@gmail.com

नवी मुंबई : पावसाळ्यामध्ये नवी मुंबई शहरामध्ये साथीच्या आजाराचे प्रमाण वाढल्याने तातडीने वैद्यकीय शिबीरांचे आयोजन करण्याची मागणी अखिल भारतीय माथाडी युनियनचे नवी मुंबई जिल्हाध्यक्ष पांडुरंग आमले यांनी महापालिका आयुक्त डॉ. कैलास शिंदे यांच्याकडे एका लेखी निवेदनातून केली आहे.

सध्या मुसळधार पाऊस नवी मुंबई शहराला झोडपून काढत आहे. शहरामध्ये ताप, मलेरिया, डेंग्यू व अन्य साथीच्या आजारांचा उद्रेक झालेला आहे. खासगी दवाखाने व रुग्णालये, पालिकेची नागरी आरोग्य केंद्र तसेच माता बाल रुग्णालयात रुग्णांची गर्दी पहावयास मिळते. त्यामुळे महापालिका प्रशासनाने नवी मुंबई शहरातील सर्वच प्रभागामध्ये तातडीने आरोग्य शिबीरांचे आयोजन करावे. नागरिकांची वैद्यकीय तपासणी करावी. घरोघरी जावून आजारी रुग्णांची रक्ततपासणी करावी. खासगी रुग्णालयांना डेंग्यू व अन्य आजारांच्या रुग्णांची माहिती कळविण्याबाबत कडक निर्देश द्यावेत, जेणेकरुन आपणास रुग्णांचा आकडा व साथीच्या आजाराचे गांभीर्य निदर्शनास येईल. मोठ्या गृहनिर्माण सोसायटीमध्ये शिबीरांचे आयोजन करावे. नागरिकांची घरटी वैद्यकीय तपासणी करण्यात यावी. त्यामुळे साथीच्या आजाराचा शहरामध्ये झालेला उद्रेक पाहता आपण आरोग्य विभागाला शहरामधील सर्वच प्रभागामध्ये तातडीने वैद्यकीय शिबीराचे आयोजन करण्याचे निर्देश देण्याची मागणी पांडुरंग आमले यांनी महापालिका आयुक्तांकडे केली आहे.