मच्छीमारांच्या सुविधांसाठी राणे मैदानात; मालेगाव-सांगलीचे आधुनिक मासळी बाजार वेळेत पूर्ण करण्याचे आदेश
मच्छीमार, मासळी विक्रेते आणि नागरिकांना अत्याधुनिक सुविधा देण्याचा मत्स्य व्यवसाय मंत्री नितेश राणेंचा निर्धार
मुंबई : वाशिम जिल्ह्यातील मालेगाव येथे आधुनिक मासळी बाजार उभारण्याच्या प्रस्तावाला शासनस्तरावर गती देण्याचे निर्देश मत्स्य व्यवसाय व बंदरे मंत्री नितेश राणे यांनी दिले आहेत. मालेगावमध्ये आधुनिक मासळी बाजारासोबतच शीतगृह, मासळी विक्री केंद्र आणि आवश्यक पायाभूत सुविधा उभारण्यासाठी योग्य जागा तातडीने निश्चित करून प्रस्ताव शासनाकडे सादर करण्याचे आदेश त्यांनी संबंधित अधिकाऱ्यांना दिले. त्याचबरोबर सांगली येथील प्रधानमंत्री मत्स्यसंपदा योजनेंतर्गत सुरू असलेल्या आधुनिक मासळी बाजाराचे कामही वेगाने पूर्ण करून उद्घाटनाची तारीख लवकर निश्चित करण्याच्या सूचना राणे यांनी दिल्या. मच्छीमार आणि मासळी विक्रेत्यांना आधुनिक सुविधा देतानाच नागरिकांना स्वच्छ व सुसज्ज बाजारपेठ उपलब्ध करून देणे हे शासनाचे उद्दिष्ट असल्याचे मंत्री नितेश राणे यांनी यावेळी स्पष्ट केले.
मंत्रालयात झालेल्या बैठकीत मंत्री नितेश राणे यांनी मालेगाव आणि सांगली येथील मासळी बाजारांच्या कामांचा आढावा घेतला. यावेळी मत्स्य व्यवसाय विभागाचे सचिव एन. रामास्वामी, मत्स्य आयुक्त भानुदास पालवे यांच्यासह संबंधित अधिकारी उपस्थित होते. आमदार भावना गवळी, जिल्हाधिकारी, नगरपालिका मुख्याधिकारी यांनी दूरदृश्य प्रणालीद्वारे बैठकीत सहभाग घेतला. सांगली-मिरज-कुपवाड महानगरपालिका आयुक्त संजीता मोहपात्रा यादेखील दूरदृश्य प्रणालीद्वारे उपस्थित होत्या.
मालेगावसाठी तातडीने प्रस्ताव सादर करण्याचे आदेश
मालेगाव येथे आधुनिक मासळी बाजार उभारण्यासाठी योग्य जागेची निवड करून त्यासंदर्भातील प्रस्ताव तातडीने शासनाकडे सादर करावा, असे स्पष्ट निर्देश मंत्री राणे यांनी दिले. प्रस्ताव प्राप्त झाल्यानंतर प्रकल्पासाठी आवश्यक तो पाठपुरावा करून आधुनिक आणि सर्व सुविधांनीयुक्त मासळी बाजार उभारण्यासाठी शासनस्तरावर सकारात्मक कार्यवाही केली जाईल, अशी ग्वाही त्यांनी दिली.
मासळी बाजार हा केवळ विक्रीची जागा न राहता मच्छीमार, मासळी विक्रेते आणि ग्राहकांना आवश्यक त्या सर्व सुविधा उपलब्ध करून देणारा आधुनिक केंद्रबिंदू असावा, यावर राणे यांनी भर दिला.
शीतगृहासह आवश्यक सुविधा उपलब्ध होणार
मालेगाव येथील प्रस्तावित आधुनिक मासळी बाजारात शीतगृह, मासळी विक्री केंद्र आणि इतर आवश्यक पायाभूत सुविधा उपलब्ध करून देण्यात येणार आहेत. यामुळे स्थानिक मच्छीमार आणि मासळी विक्रेत्यांना व्यवसायासाठी अधिक चांगल्या सुविधा मिळतील. तसेच नागरिकांनाही स्वच्छ, सुरक्षित आणि सुसज्ज वातावरणात मासळी खरेदी करता येणार आहे. मासळी व्यवसायाला अधिक शिस्तबद्ध, आधुनिक आणि सुविधायुक्त स्वरूप देण्याच्या दृष्टीने या प्रकल्पाला महत्त्व असल्याचे बैठकीत स्पष्ट करण्यात आले.
सांगलीचा प्रकल्पही राणेंच्या रडारवर
दरम्यान, प्रधानमंत्री मत्स्यसंपदा योजनेअंतर्गत सांगली येथे विकसित होत असलेल्या आधुनिक मासळी बाजाराच्या कामाचाही मंत्री राणे यांनी आढावा घेतला. प्रकल्पाच्या सद्यस्थितीची माहिती घेतल्यानंतर बांधकामाचे काम अधिक वेगाने पूर्ण करण्याचे निर्देश त्यांनी संबंधित यंत्रणेला दिले. सांगलीतील आधुनिक मासळी बाजाराचे काम वेळेत पूर्ण करून उद्घाटनाची तारीख लवकर निश्चित करा, अशा स्पष्ट सूचना राणे यांनी दिल्या. प्रकल्पाच्या अंमलबजावणीत कोणताही विलंब होऊ नये आणि संबंधित विभागांनी समन्वयाने काम करावे, असेही त्यांनी सांगितले.
