व्यसनमुक्ती जनजागृतीकार दिलीप आमले यांचा इशारा
नवी मुंबई : नेरूळ पूर्व आणि पश्चिम परिसर आजमितीला पूर्णपणे अमली पदार्थ विक्रेत्यांच्या विळख्यात अडकला असून या स्टेशन परिसरातील अमली पदार्थ विक्रेत्यांव १५ दिवसाच्या आत कायदेशीर कारवाई न झाल्यास व या समस्येचा समूळ नाश न झाल्यास बेमुदत उपोषणाला बसणार असल्याचा इशारा व्यसनमुक्ती जनजागृतीकार दिलीप आमले यांनी दिला आहे.
नेरूळ रेल्वे स्टेशन परिसर दोन्ही बाजूला खुलेआमपणे अमली पदार्थाची विक्री करताना महिला पहावयास मिळतात. स्टेशनचा आतील व बाहेरील परिसर भिक्षेकऱ्यांनी व्यापला आहे. रेल्वे, महापालिका, पोलीस कारवाई करत नसल्याने स्टेशनच्या दोन्ही बाजूस अमली पदार्थ विक्रीचा व्यवसाय फोफावला असल्याचा संताप दिलीप आमले यांनी व्यक्त केला आहे.
बेमुदत उपोषणाबाबत व या समस्येचे गांभीर्य निदर्शनास आणून देण्यासाठी दिलीप आमले यांनी नवी मुंबईच्या महापौर सौ. सुजाताताई पाटील, नवी मुंबईचे पोलीस उपायुक्त, अतिरिक्त पोलीस आयुक्त – गुन्हे अन्वेषण विभाग, अंमली पदार्थ विरोधी विभाग- नवी मुंबई, वरिष्ठ पोलीस निरीक्षक – नेरूळ पोलीस स्टेशन, सहाय्यक आयुक्त/वार्ड अधिकारी – नवी मुंबई महापालिका, नेरूळ या सर्वांना विस्तृतपणे निवेदन सादर केले आहे.
निवेदनामध्ये दिलीप आमले यांनी नेरूळ स्टेशन पूर्व-पश्चिम परिसरातील अंमली पदार्थ विक्रीवर तात्काळ व कडक कायदेशीर कारवाई करावी, फेरीवाल्यांच्या आडून नशेचे पदार्थ विक्री होत असल्यास त्याची कायदेशीर तपासणी व कारवाई करावी, गर्दीच्या ठिकाणी होणाऱ्या मारामारी व गुन्हेगारी प्रकारांना आळा घालावा, महिला, विद्यार्थी, ज्येष्ठ नागरिक व सर्वसामान्य नागरिकांच्या सुरक्षिततेसाठी कायमस्वरूपी पोलीस बंदोबस्त ठेवावा, पोलीस, महानगरपालिका व अंमली पदार्थ विरोधी विभाग यांच्या संयुक्त कारवाईचे कायमस्वरूपी नियोजन करावे, केवळ एक-दोन दिवसांची कारवाई न करता सातत्यपूर्ण देखरेख व कायदेशीर कारवाई करावी या मागण्या केल्या असून संबंधित प्रशासनाने पुढील १५ दिवसांत ठोस कायदेशीर कारवाई व कायमस्वरूपी बंदोबस्त न केल्यास लोकहितासाठी व्यसनमुक्ती जनजागृतीच्या माध्यमातून बेमुदत उपोषण करण्याचा इशारा दिलीप आमले यांनी दिला आहे.
