ब्रॉन्कायटिस आणि छातीतील संसर्गावरील उपचारांना यश; पुढील उपचार घरीच सुरू राहणार
स्वयंम खांडगेपाटील : Navimumbailive.com@gmail.com
मुंबई : राष्ट्रवादी काँग्रेस (शरदचंद्र पवार) पक्षाचे अध्यक्ष आणि ज्येष्ठ नेते शरद पवार यांना आज मुंबईतील ब्रीच कँडी रुग्णालयातून डिस्चार्ज देण्यात आला. उपचारांनंतर त्यांच्या प्रकृतीत सुधारणा झाली असून सध्या त्यांची प्रकृती स्थिर असल्याची माहिती रुग्णालयातील डॉक्टरांनी दिली. पुढील उपचार आणि औषधोपचार घरीच सुरू राहणार आहेत.
शरद पवार यांना खोकला, ब्रॉन्कायटिसचा त्रास आणि छातीत संसर्ग झाल्यामुळे ४ नोव्हेंबर रोजी पुढील उपचारांसाठी ब्रीच कँडी रुग्णालयात दाखल करण्यात आले होते. त्यांच्यावर डॉ. प्रतीत समदानी यांच्या देखरेखीखाली उपचार सुरू होते. उपचारांना त्यांनी चांगला प्रतिसाद दिला असून प्रकृतीत सुधारणा झाल्यानंतर डॉक्टरांनी त्यांना घरी जाण्याची परवानगी दिली.
डिस्चार्जबाबत माहिती देताना डॉ. प्रतीत समदानी यांनी सांगितले की, शरद पवार यांची प्रकृती स्थिर आहे. त्यांना ब्रॉन्कायटिसचा त्रास आणि छातीत संसर्ग झाला होता. आता त्यात सुधारणा झाली आहे. पुढील उपचार घरीच सुरू ठेवण्याचा सल्ला देण्यात आला आहे.
शरद पवार यांचे वय लक्षात घेता डॉक्टरांनी त्यांना औषधोपचारांसोबतच विश्रांती आणि काही अतिरिक्त खबरदारी घेण्याच्या सूचना दिल्या आहेत. दरम्यान, रुग्णालयातून डिस्चार्ज मिळाल्यानंतर ते मुंबईतील सिल्व्हर ओक या निवासस्थानी परतणार आहेत.
