नवी मुंबईः घरफोड्या करणार्‍या चोरट्यांनी १७ सप्टेंबर रोजी भरदिवसा वाशीतील दत्त मंदिराजवळ असलेल्या इमारतीत घरफोडी करुन १ लाख ६४ हजार रुपये किंमतीचा ऐवज चोरुन नेल्याची घटना उघडकीस आली आहे. वाशी पोलिसांनी याप्रकरणी अज्ञात चोरट्याविरोधात गुन्हा दाखल करुन या प्रकरणाचा तपास सुरु केला आहे.
वाशीतील दत्त मंदिराजवळ असलेल्या वाशी निवास इमारतीत कृष्ण मोइनसिंग आपल्या कुटुंबासह रहावयास असून १७ सप्टेंबर रोजी दुपारी दीड वाजता ते कामानिमित्त बाहेर गेले होते. यादरम्यान त्यांचे घर बंद असल्याची संधी साधून चोरट्यांनी त्यांच्या घराचा कडी-कोयंडा तोडून त्यांच्या घरातील रोख रक्कम आणि दागिने असा १ लाख ६४ हजार रुपये किंमतीचा ऐवज चोरुन नेला. दरम्यान, सायंकाळी ७.३० वाजता सिंग घरी परतले असता त्यांना घरात चोरी झाल्याचे निदर्शनास आले. त्यानंतर त्यांनी वाशी पोलीस ठाण्यात याबाबत तक्रार दाखल केली. त्यानुसार पोलिसांनी अज्ञात चोरट्याविरोधात घरफोडीचा गुन्हा दाखल करुन पुढील तपास सुरु केला आहे.
वाशीत भरदिवसा घरफोडी
