अलिबाग : रायगड जिल्हा पोलीस मुख्यालयाच्या आवारात आज दुपारी मोटारसायकलचा स्फोट झाला. यात एक पोलीस कर्मचारी गंभीर जखमी झाला. मोटारसायकल सुरु करताना हा स्फोट झाला.
या अपघातात निकेश पाटील हा पोलीस कर्मचारी जखमी झाला. त्याला उपचारासाठी मुंबईत हलविण्यात आले आहे. पाटील हा श्रीवर्धन पोलीस ठाण्यात सेवा बजावत आहे. सध्या तो प्रशिक्षणासाठी अलिबाग येथील पोलीस मुख्यालयात आला होता. आज १२.३० वाजण्याच्या सुमारास पोलीस मुख्यालयाच्या आवारात उभी असलेली मोटारसायकल निकेश सुरू करत असताना हा स्फोट झाला.
अलिबागच्या जिल्हा रूग्णालयात प्राथमिक उपचार केल्यानंतर पाटील याला अधिक उपचारांसाठी मुंबईत हलविण्यात आलेय. या स्फोटात मोटारसायकलचेही नुकसान झाले आहे. हा स्फोट नेमका कोणत्या कारणाने झाला हे अद्याप स्पष्ट झालेले नाही.
दरम्यान, ज्या ठिकाणी स्फोट झाला त्या जागेपासून काही अंतरावर पोलिसांचा शस्त्रसाठा आहे. त्यामुळे पोलीस याकडे गांभीर्याने पाहात आहेत. पोलिसांकडून श्वानपथक तसेच मेटल डिटेक्टरद्वारे तपासणी करण्यात आली.
रायगडमध्ये मोटारसायकल स्फोटात पोलीस जखमी
