बाळकृष्ण पूर्णेकर यांच्या निधनावर महाराष्ट्र प्रदेश काँग्रेस कमिटीचे अध्यक्ष खा. अशोक चव्हाण यांची प्रतिक्रिया
मुंबई : प्रदेश काँग्रेसचे सचिव बाळकृष्ण पूर्णेकर यांच्या निधनाने काँग्रेस पक्षाने लढवय्या कार्यकर्ता गमावला आहे, अशा शब्दात महाराष्ट्र प्रदेश काँग्रेस कमिटीचे अध्यक्ष खा. अशोक चव्हाण यांनी शोक व्यक्त केला आहे.
बाळकृष्ण पूर्णेकर यांच्या निधनावर दुःख व्यक्त करताना ते म्हणाले की, बाळकृष्ण पूर्णेकरांनी विद्यार्थी चळवळीतून आपल्या राजकीय आणि सामाजिक कार्याला सुरुवात केली. त्यांनी युवक काँग्रेस मध्ये विविध पदे भूषवली. ठाणे शहर काँग्रेसचे अध्यक्ष, महाराष्ट्र प्रदेश काँग्रेस कमिटीचे सचिव म्हणून त्यांनी पक्षाच्या वाढीसाठी मोलाचे योगदान दिले. बाळकृष्ण पूर्णेकर यांच्या अपघाती निधनाने महाराष्ट्र प्रदेश काँग्रेस कमिटीची मोठी हानी झाली आहे.
बाळकृष्ण पूर्णेकर यांना भावपूर्ण श्रध्दांजली अर्पण करून महाराष्ट्र प्रदेश काँग्रेस कमिटी पूर्णेकर कुटुंबियांच्या दुःखात सहभागी असल्याचे खा. चव्हाण यांनी म्हटले आहे.
