नवी मुंबई – राष्ट्रवादी काँग्रेस पार्टी सानपाडा विभागाच्या वतीने सानपाडा सेक्टर ८ मधील हुतात्मा बाबू गेनू सैद मैदान येथे आयोजित करण्यात आलेल्या शिवजयंती उत्सवाला सानपाडा वासियांचा भरघोस प्रतिसाद मिळाला. छत्रपती शिवाजी महाराज यांच्या पुतळ्याला पुष्पहार अर्पण करून शिवजयंती उत्सवाला सुरुवात करण्यात आली. यावेळी लोकनेते गणेश नाई साहेब, राष्ट्रवादी काँग्रेस पार्टीचे नवी मुंबई जिल्हाध्यक्ष अनंत सुतार,महिला जिल्हाध्यक्षा माधुरी सुतार,युवकचे जिल्हाध्यक्ष सूरज पाटील,स्थानिक नगरसेविका संगीता बोऱ्हाडे,ज्येष्ठ पत्रकार अनंत पाटील, टीव्ही ९ मराठी न्यूज चॅनेलचे पत्रकार योगेश शेटे आदी उपस्थित होते.
शिवजयंती उत्सवाच्या निमित्ताने महिलांसाठी हळदी कुंकू समारंभाचे विशेष आयोजन करण्यात आले होते. यावेळी चमचा लिंबू स्पर्धा ,बादलीत बॉल टाकणे स्पर्धा यांसारखे विविध खेळ महिलांसाठी खेळविण्यात आले. विजेत्या स्पर्धकांना आकर्षक बक्षिसे देऊन गौरविण्यात आले. प्रत्येक सेक्टरसाठी लकी ड्रॉ ठेवण्यात आला होता. या लकी ड्रॉ मधील विजेत्या १० महिला स्पर्धकांना पैठणींचे वाटप करण्यात आले. सानपाडा सेक्टर ७ मधील न्यू अवधूत सोसायटीतील सुनीता माने यांनी मानाची सोन्याची नथ मिळविण्याचा मान पटकाविला. नवी मुंबई महानगर पालिकेला स्वच्छ सर्वेक्षण २०१८ मध्ये देशात प्रथम क्रमांक मिळावा या उद्देशाने हळदी कुंकू समारंभात सानपाडा विभागातील दोन हजार महिलांना वाण म्हणून कचऱ्याच्या कुंड्यांचे वाटप करून जनजागृती करण्यात आली. यावेळी लोकगीते,पोवाडे,नाटक,लावणी,नृत्य,कोळी गीते यांसारख्या सांस्कृतिक कार्यक्रमाचे देखील आयोजन करण्यात आले. लोकनेते गणेश नाईक यांच्या हस्ते विविध क्षेत्रात उल्लेखनीय कामगिरी करणाऱ्या मान्यवरांचा शाल व पुष्पगुच्छ देऊन सत्कार करण्यात आला. हा कार्यक्रम यशस्वी करण्यासाठी राष्ट्रवादी काँग्रेस पार्टीचे सानपाडा – जुईनगर तालुकाध्यक्ष दिलीप बोऱ्हाडे,राष्ट्रवादी काँग्रेस पार्टीचे सानपाडा प्रभाग क्रमांक ७४ चे वॉर्ड अध्यक्ष राजेश ठाकूर, समाजसेवक सुनिल कुरकुटे या आयोजकांनी विशेष मेहनत घेतली.
