वेस्ट इंडिज संघाच्या भारत दौऱ्यासाठी टीम इंडियाची घोषणा करण्यात आली आहे. ४ ऑक्टोंबरपासून दोन्ही देशांमध्ये दोन कसोटी सामन्यांची मालिका खेळली जाणार आहे. निवड समितीने सध्या खराब कामगिरी करणाऱ्या शिखर धवन, मुरली विजय आणि इशांत शर्मा यांना संघातून वगळले आहे. अपेक्षेप्रमाणे पृथ्वी शॉ आणि मयांक अग्रवाल या नव्या चेहऱ्यांना संधी देण्यात आली आहे. राजकोट आणि हैदराबाद येथे हे सामने होणार आहेत.
देशांतर्गत क्रिकेट स्पर्धांमध्ये खोऱ्याने धावा काढणाऱ्या कर्नाटकच्या मयांक अग्रवालला अखेर भारतीय संघात स्थान मिळाले आहे. शनिवारीच त्याने वेस्ट इंडिज विरुद्धच्या सराव सामन्यात अध्यक्षीय संघाकडून खेळताना ९० धावांची खेळी केली. नुकत्यात झालेल्या इंग्लंड दौऱ्यात शिखर धवनने अत्यंत निराशाजनक कामगिरी केली होती. त्याला आठ डावात संधी मिळूनही एकदाही अर्धशतकी खेळी करता आली नव्हती. करुण नायर, दिनेश कार्तिक या दोघांनाही संधी मिळालेली नाही.
पहिला सामना ४ ऑक्टोंबरपासून राजकोट येथील सौराष्ट्र क्रिकेट असोशिएशनच्या मैदानावर होणार आहे. त्यानंतर दुसरा सामना १२ ऑक्टोंबरपासून हैदराबादच्या राजीव गांधी आंतरराष्ट्रीय स्टेडियमवर सुरु होईल. सध्याचे भारतीय संघाचे व्यस्त वेळापत्रक लक्षात घेऊन निवड समितीने भुवनेश्वर कुमार आणि जसप्रीत बुमराह यांना विश्रांती देण्याचा निर्णय घेतला. इशांत शर्मा आणि हार्दिक पांडया यांच्या नावाचा विचार झाला नाही.
विराट कोहली (कर्णधार), लोकेश राहुल, पृथ्वी शॉ, मयांक अग्रवाल, चेतेश्वर पूजारा, अजिंक्य रहाणे (उपकर्णधार), ऋषभ पंत (विकेटकीपर), हनुमान विहारी, आर. अश्विन, रविंद्र जाडेजा, कुलदीप यादव, मोहम्मद शामी, उमेश यादव, मोहम्मद सिराज आणि शार्दुल ठाकूर.
