भास्कर जाधव : Navimumbailive.com@gmail.com
नवी मुंबई : सारसोळे गाव व नेरूळ सेक्टर सहा परिसरातील गटारांच्या सफाईतून निघालेला कचरा व मातीचे ढिगारे तात्काळ हटविण्याची मागणी सारसोळे गावातील कोलवाणी माता मित्र मंडळाचे अध्यक्ष मनोज यशवंत मेहेर यांनी महापालिका आयुक्त अण्णासाहेब मिसाळ यांच्याकडे केली आहे.
सारसोळे गाव व नेरूळ सेक्टर सहा परिसरात पावसाळी पूर्व कामांअंर्तगत महापालिका प्रशासनाने गटारांची सफाई करताना त्यातील माती व गटारात तुंबलेला कचरा काढण्यात आला. त्याबाबत सर्वप्रथम आपले सारसोळेच्या ग्रामस्थांकडून व नेरूळ सेक्टर सहामधील रहीवाशांकडून मनापासून मनोज मेहेर यांनी आभार मानले. सारसोळे गाव व नेरूळ सेक्टर सहा परिसरातील गटारांची सफाई करावी यासाठी मनोज मेहेर यांनी एक महिन्यापूर्वीच महापालिका प्रशासनाला निवेदनही सादर केले होते.
महापालिका प्रशासनाने गटारांची सफाई करताना जो गाळ, कचरा बाहेर काढला, त्यालाही आता सहा-सात झाले आहेत. गटारातून बाहेर काढलेला गाळ, कचरा आता सुकला असून त्याची दुर्गंधी आता ग्रामस्थांना व रहीवाशांना सहन करावा लागत आहे. सध्या कोरोनाचा काळ आहे. आमच्या परिसरात ७ कोरोनाचे रूग्ण सापडले आहे. परिसरातील रहीवाशांत भीतीचे वातावरण आहे. त्यातच या दुर्गंधी पसरल्याने लोकांमध्ये आजार वाढण्याची भीती आहे. ही समस्या दोन दिवसापूर्वीच पालिका नेरूळ विभाग कार्यालयाच्या निदर्शनास आणून देवूनही कचरा व मातीचे ढिगारे अजूनही हटविण्यात आलेले नाहीत. यामुळे परिसरालाही बकालपणा आलेला असल्याचे मनोज मेहेर यांनी पालिका प्रशासनाच्या निदर्शनास आणून दिले आहे.
लोक नाराज आहेत. कोरोनाच्या भीतीखाली वावरत आहेत. त्यातच आता कचऱ्याच्या सुकलेल्या ढिगाऱ्यामुळे दुर्गंधीचाही सामना करावा लागत आहे. समस्येचे गांभीर्य पाहून आपण पालिकेच्या संबंधित विभागाला सेक्टर सहा परिसरातील व सारसोळे गावातील गटारांच्या बाजूलाच ठेवलेले मातीचे ढिगारे व कचरा हटविण्याचे आदेश देण्याची मागणी मनोज मेहेर यांनी केली आहे.
मनोज मेहेर यांनी ईमेलच्या माध्यमातून महापालिका आयुक्त अण्णासाहेब मिसाळ यांच्याकडे ही तक्रार करताच त्यांनी अवघ्या २५ मिनिटात मनोज मेहेर यांच्या तक्रारीची दखल घेत उपायुक्त टी.पी.पवार यांना या समस्येचे निवारण करण्याचे निर्देश दिले.
