नवी मुंबई : नवी मुंबई महानगरपालिकेच्या वाशी येथील प्रथम संदर्भ रूग्णालयातील रूग्णवाहिकेवरील कोरोनाबाधित वाहनचालक राजेंद्र भवारी यांचे निधन झाले. महापालिका आयुक्त अण्णासाहेब मिसाळ यांनी भवारीच्या वारसास अनुकंपा तत्वावर महापालिकेत नोकरी देण्याचे जाहिर केले आहे.
पंतप्रधान गरीब कल्याण पॅकेज इन्श्युरन्स स्कीम फॉर हेल्थ वर्कस या केंद्र सरकाऱच्या पॅकेजअंर्तगत ५० लाख रूपये आणि नवी मुंबई महानगरपालिकेच्या वतीने कामगार कल्याण निधीतून २५ लाख असे ७५ लाख रूपयेही भवारी यांच्या परिवारास देण्यात येणार आहे.
कोरोनामुळे महापालिका कर्मचाऱ्याचे निधन होण्याची ही पहिलीच घटना आहे. यापूर्वी आरोग्य खात्यातील डॉक्टर, परिचारिका व इतर कर्मचारी तसेच परिवहन विभागातील तिकिट तपासनीस यांनाही कोरोना पॉझिटिव्ह झाल्याचे उघडकीस आले होते. परंतु कोरोनाने महापालिका कामगाराचे निधन झाल्याने महापालिका कामगार वर्गात भीतीचे वातावरण पसरले आहे.
