नवी मुंबई : कोरोना रोगाने मयत झालेल्या मृतदेहांवरील अंत्यसंस्कारांसाठी नवी मुंबई शहरामध्ये स्वतंत्र स्मशानभूमी बनविण्याची मागणी सारसोळे गावातील कोलवानी माता मित्र मंडळाचे अध्यक्ष मनोज यशवंत मेहेर यांनी बुधवारी (दि. २७ मे) मुख्यमंत्री उध्दव ठाकरे, आरोग्यमंत्री राजेश टोपे आणि ठाण्याचे पालकमंत्री एकनाथ शिंदे यांच्याकडे करताना नवी मुंबई महापालिकेला तसे निर्देश देण्याचीही मागणी केली आहे. यापूर्वी हीच मागणी १७ मे २०२० रोजी मनोज मेहेर यांनी राज्य सरकारकडे केली होती.
नवी मुंबई शहरामध्ये कोरोना रूग्णांची संख्या वाढत आहे.काही रूग्णांचे निधनही झाले आहे.कोरोनाबाबत सर्वसामान्य नवी मुंबईकरांमध्ये भीतीचे वातावरण आहे. त्यातच नवी मुंबई महानगरपालिका प्रशासनाने कोरोनाचे मृतदेह एका विभागातील व अत्यंविधीसाठी पाठविले भलत्याच विभागात. हा प्रकार नेरूळ सेक्टर चार येथील सारसोळे शांतीधाम स्मशानभूमीमध्ये तुर्भे येथे राहणाऱ्या दोन कोरोना रूग्णांने मृत झालेल्यांचे मृतदेह अंत्यविधीसाठी आणले असता मी तो प्रकार काही दिवसापूर्वी हाणून पाडला व संबंधित मृतदेह अंत्यविधीसाठी तुर्भे स्मशानभूमीत पाठवून दिले. आज कोरोनाबाबत भीतीचे वातावरण असल्याने इतर विभागातील मृतदेह आपल्या विभागात जाळण्यास त्या त्या भागातील स्थानिक हे विरोध करणारच. त्यामुळे स्थानिकांमध्ये संताप निर्माण होवून यातून कायदा व सुव्यवस्थेचाही प्रश्न निर्माण होण्याची शक्यता नाकारता येत नाही. तशी परिस्थिती आज निर्माण झालेली असल्याचे मनोज मेहेर यांनी निवेदनातून राज्य सरकारच्या निदर्शनास आणून दिले आहे.
कोरोना व्हायरस हा नवी मुंबईतूनच नाहीतर देशातून किमान दीड ते दोन वर्षे जाणार नसल्याची शक्यता देशाच्या केंद्रीय आरोग्य विभागाकडूनच व्यक्त करण्यात येत आहे.त्यामुळे कोरोना मृतदेहांच्या अंत्यविधीवरून वादाच्या घटना होण्याऐवजी नवी मुंबई महापालिका प्रशासनाकडून तातडीने निवासी परिसरापासून लांबवर कोरोनाने निधन झालेल्या मृतदेहांवर अंत्यविधीसाठी स्वतंत्र स्मशानभूमी लवकरात लवकर बांधण्यात यावी. ही स्मशानभूमी कोरोनाच्या पार्श्वभूमीवर लवकरात लवकर उभारण्याचे नवी मुंबई महापालिका प्रशासनाला आपण निर्देश द्यावेत अशी मागणी मनोज मेहेर यांनी केली आहे.
