नवी मुंबई : नेरूळ सेक्टर ४ मधील साई प्राईड व वाधवा टॉवरमधील रस्त्याची तसेच तेथील परिसराची सफाई करण्याची मागणी नवी मुंबई जिल्हा कॉंग्रेसच्या सचिव विद्या भांडेकर यांनी महापालिका आयुक्त अभिजित बांगर यांच्याकडे एका लेखी निवेदनातून केली आहे. याच मागणीसाठी विद्या भांडेकर यांनी महापालिका नेरूळ विभाग अधिकारी दत्तात्रेय नांगरे यांनाही स्वतंत्र निवेदना सादर केले आहे.
नवी मुंबई महापालिका प्रशासनाकडून सध्या स्वच्छता अभियान जोरदारपणे राबविले जात आहे. शहरातील अंर्तगत तसेच बाह्य भागातील सार्वजनिक जागा, इमारतींच्या संरक्षक भिंतीची सुभाषिते टाकून रंगरंगोटीही केली जात आहे. या स्वच्छता अभियानामध्ये नेरूळ सेक्टर ४ परिसर वगळला तर नाही ना, असा संशय स्थानिक रहीवाशांकडून व्यक्त केला जात असल्याचे विद्या भांडेकर यांनी निवेदनातून महापालिका प्रशासनाच्या निदर्शनास आणून दिले आहे.
नेरूळ सेक्टर ४ मधील साई प्राईंड व वाधवा टॉवरमध्ये एक रस्ता आहे. या ठिकाणी आपण स्वत: भेट दिल्यास त्या ठिकाणी असलेला कचरा, अस्वच्छता, बकालपणा , सफाईकडे होत असलेला कानाडोळा आपल्याला दिसून येईल. या रस्त्यावर तसेच तेथील ठिकाणी असलेल्या अस्वच्छतेमुळे तेथे दुर्गंधी पसरली आहे. येथील अस्वच्छतेमुळे परिसराला बकालपणा आला आहे. या ठिकाणी स्वच्छता अभियान तातडीने राबवून तेथील परिसराची स्वच्छता करणे आवश्यक आहे. स्थानिक रहीवाशांमध्ये पालिका प्रशासनाबाबत नाराजीचा सूर आळविला जात आहे. येथील स्वच्छतेबाबत संबंधितांना निर्देश देण्याची मागणी विद्या भांडेकर यांनी महापालिका प्रशासनाकडे केली आहे.
