नवी मुंबई : शिरवणे गावातील एका युवकाला मित्रासोबत दुचाकीवरून जात असताना तीन जणांनी अचानक प्राणघातक हल्ला केला. ही घटना शुक्रवारी घडली असून नेरूळ पोलीस ठाण्यात रविवारी याप्रकरणी गुन्हा दाखल झाला आहे. मात्र घटनेनंतर हल्लेखोर अजून फरारच असल्याने हल्लेखोरांना लवकरात लवकर अटक करण्याची मागणी केली जावू लागली आहे.
विश्वनाथ सुतार असे हल्ला झालेल्या युवकाचे नाव असून युवकाची प्रकृती आजही चिंताजनक आहे. विश्वनाथ सुतार हा शुक्रवारी रात्री मित्राच्या दुचाकीवरून घरी जात असताना तीन हल्लेखोरांनी त्यावर प्राणघातक हल्ला करून ते फरार झाले. विश्वनाथ गंभीर जखमी होवून तेथेच कोसळला. सुर्दैवाने विश्वनाथ यांचे बंधू विवेक सुतार त्याच रस्त्यावरून जात असताना त्यांनी जखमी अवस्थेतील विश्वनाथला घरी नेले. विश्वनाथच्या अंगावर फारशा जखमाही नव्हत्या.शनिवारी सकाळी विश्वनाथ बेशुध्दावस्थेतच असल्याने शनिवारी त्यास डीवायपाटील रूग्णालयात उपचारासाठी नेले असता डोक्याला जबर मार लागल्याचे व आतील भागात गंभीर जखमा झाल्याचे निदर्शनास आले. विवेक सुतार यांनी याप्रकरणी नेरूळ पोलिस ठाण्यात गुन्हा नोंदविला आहे. घटना घडून 100 तासाचा व गुन्हा नोंदवून 60 तासाचा कालावधी लोटला तरी हल्लेखोर अद्यापि नेरूळ पोलिसांना सापडलेले नाहीत. हल्लेखोरांचा लवकरात लवकर शोध घेण्याची मागणी विवेक सुतार यांनी केली आहे.
