नवी मुंबई : प्रभाग ९६ मधील नेरूळ सेक्टर १६ ए मधील मिनाताई ठाकरे मैदानाशेजारी असलेले रोड कटींग मशिन तातडीने तेथून हलविण्याची मागणी जनसेवक गणेश भगत यांनी महापालिका नेरूळ विभाग अधिकाऱ्यांकडे एका निवेदनातून केली आहे.
प्रभागातील नेरूळ सेक्टर १६ ए मधील मिनाताई ठाकरे मैदानाशेजारी रोड कटींग मशिन दोन महिन्याहून अधिक काळ पडून आहे. महानेटचे काम करताना रोडकटींगचे काम झाल्यावर ते मशिन तेथेच संबंधितांना बेवारस अवस्थेत सोडून दिलेले आहे. यामुळे परिसराला बकालपणा आला असून सफाई कामगारांनाही तिथे स्वच्छता ठेवण्यास अडचणींचा सामना करावा लागत आहे. परिसरातील मुले तिथे खेळताना दिसून येतात. रोड कटींगमुळे कोणाला दुखापत झाल्यास त्यास महापालिका प्रशासनाला जबाबदार धरण्यात येईल. समस्येचे गांभीर्य पाहता व स्थानिक लोकांमध्ये उमटत असलेला नाराजीचा सूर पाहता ते मशिन तेथून तातडीने हलवावे अशी मागणी गणेश भगत यांनी केली आहे.
