जयेश खांडगेपाटील : Navimumbailive.com@gmail.com
नारायणगाव : राज्य पुरस्कार प्राप्त हलगी सम्राट केरबा पाटील यांच्या १८ व्या पुण्यस्मरणदिनाचे आयोजन हलगी सम्राट केरबा पाटील संस्था, महा-ई-सेवा केंद्र, आणि द युवा ग्रामीण पत्रकार संघाच्या विद्यमाने फुलसुंदर मार्केट नारायणगाव येथे करण्यात आले होते.
या कार्यक्रमाच्या निमित्ताने प्रमुख पाहुणे प्राचार्य डॉ. पांडुरंग गायकवाड म्हणाले, ‘तमाशा कलाक्षेत्रात केरबा पाटील यांनी जिद्द, चिकाटी आणि आत्मविश्वास बाळगला. त्यामुळेच त्यांचे नाव तमाशा कला क्षेत्रात नावलौकिक आजरावर आहे. त्यांचे शालेय शिक्षण कमी होते. पण ते हलगी कलेच्या शिक्षणात पारंगत होते. हलगी वाद्याच्या छंदाने त्यांचे शालेय शिक्षण कमी झाले. पण त्यांनी त्यांचे भाऊ, मुले, नातवंडे यांना शिक्षण क्षेत्रात अग्रेसर केले’.
‘कला आणि शिक्षण हे माणसाला नावलौकिक मिळवून देतात. त्याचे उत्तम उदाहरण राज्य पुरस्कार प्राप्त हलगी सम्राट केरबा पाटील बस्तीसावरगावकर हे आहेत. त्यांच्याच विचारांचा वसा आणि वारसा घेऊन त्यांचा मुलगा साहित्यरत्न अण्णाभाऊ साठे शासन समाजभूषण पुरस्कार्थी काशिनाथ आल्हाट सामाजिक सेवेत कार्यरत आहेत. या निमित्ताने ज्येष्ठ तमाशा व्यवस्थापक बबन दळवी, श्रीमती गायत्रीताई बेल्हेकर, वनकर्मचारी अनिल शिंदे, सेवानिवृत्त आदर्श केंद्रप्रमुख दादाभाऊ आल्हाट या मान्यवरांनी मनोगते व्यक्त केली.
कार्यक्रमाच्या निमित्ताने अहिल्यादेवी पतसंस्थेचे चेअरमन रामचंद्र शेगर, अष्टपैलू कलाकार राजेश खोल्लम, तमाशा फड मालक संजय महाडिक, सामाजिक कार्यकर्ते बाळासाहेब कदम, नारायणगावचे ज्येष्ठ नागरिक अरुण वाव्हळ, महा ई सेवा केंद्राचे प्रमुख ज्ञानेश्वर बेनके आदी उपस्थित होते. कार्यक्रमाचे प्रस्ताविक संस्थेचे संस्थापक अध्यक्ष काशिनाथ आल्हाट यांनी केले. तर आभार द युवा ग्रामीण पत्रकार संघाचे अथर्व खांडगे यांनी मानले .
या पुण्यस्मरणाच्या निमित्ताने जुन्नर, आंबेगाव, खेड तालुक्यातील २५ कलाकारांचे राजर्षी शाहू महाराज ज्येष्ठ साहित्यिक व कलाकार मानधन सन्मान योजनेचे ऑनलाइन फॉर्म फुलसुंदर मार्केट महा ई सेवा केंद्र नारायणगाव येथे भरून घेण्यात आले. या कार्यक्रमासाठी प्रविण खुडे, नवनाथ आल्हाट आणि महा-ई-सेवा केंद्राचे सर्व कर्मचारी यांनी विशेष परिश्रम घेतले.
