नवी मुंबई : नेरूळ सेक्टर चारमधील नेताजी सुभाषचंद्र बोस उद्यानातील समस्यांचे निवारण करण्याची मागणी नवी मुंबई जिल्हा कॉंग्रेसचे सचिव विद्याताई भांडेकर यांनी महापालिकेच्या नेरूळ विभाग अधिकाऱ्यांकडे एका लेखी निवेदनातून दिली आहे.
नेरूळ सेक्टर चारमधील सिडको वसाहतीमध्ये नेताजी सुभाषचंद्र बोस उद्यान आहे. या उद्यानाकडे मनपा प्रशासनाने लक्ष न दिल्याने उद्यानात अनेक समस्या असून स्थानिक रहिवाशांना त्याचा त्रास सहन करावा लागत आहे. उद्यानात सफाई वेळच्या वेळी होत नसल्याने कचरा विखुरलेला असतो. बांधकाम साहित्य विखुरलेले असते. ते एका जागी असणे आवश्यक आहे, विखुरलेल्या बांधकाम साहित्यामुळे स्थानिकांना त्रास होत आहे. उद्यानात दररोज सफाई करण्यात यावी. बांधकाम साहित्य व्यवस्थित ठेवण्याचे निर्देश संबंधितांना देण्याची मागणी विद्याताई भांडेकर यांनी महापालिका प्रशासनाकडे केली आहे.
