नवी मुंबई : दिघा ते बेलापुर या महापालिका कार्यक्षेत्रातील पालिका क्रिडांगणावर क्रिडाविषयक सुविधा उपलब्ध करुन देण्याची लेखी मागणी एमआयएमचे युवा नेते नवी मुंबईसह कोकण विभागाचे प्रभारी हाजी शाहनवाज खान यांनी महापालिका आयुक्त कैलाश शिंदे यांच्याकडे केली आहे.
नवी मुंबई महापालिका कार्यक्षेत्रात दिघा ते बेलापुरदरम्यान महापालिकेच्या मालकीची असंख्य क्रिडांगणे पहावयास मिळतात. ही क्रिडांगणे आजही अविकसित असून काही ठिकाणच्या क्रिडांगणाला बकालपणा प्राप्त झालेला आहे. देश व राज्य पातळीवर विविध पुरस्कार मिळविणाऱ्या नवी मुंबई महापालिका प्रशासनाला ही बाब नक्कीच भूषणावह नाही. क्रिडांगणे विकसित करुन तेथे क्रिडा सुविधा उपलब्ध करुन देणे महापालिका प्रशासनाचे कर्तव्य आहे. केवळ ओपन जीम, मॉर्निग वॉकसाठी पायवाटा बनवून महापालिकेची जबाबदारी संपत नाही. क्रिडांगणावर क्रिकेटसाठी खेळपट्टी, बॅडमिंटन कोर्ट, फुटबॉलसाठी गवत, व्हॉलीबॉलसाठी नेट या सुविधा उपलब्ध करुन दिल्यास मुले मोबाईल सोडून नक्कीच मैदानाकडे वळतील.अॅथेलीट घडविण्यासाठी मैदानाच्या चारही बाजूला धावण्याची व्यवस्था केल्यास खेळाडू मैदानासभोवताली गोलाकार धावताना दिसतील. मैदाने महापालिकेच्या मालकीची असल्याने कोणाच्याही खासगी खेळपट्टी त्या ठिकाणी नसाव्यात. असल्या तर त्या खेळपट्ट्या तोडून महापालिकेने स्वत:च्या खेळपट्टी तयार कराव्यात. महापालिका क्रिडांगणावर खेळपट्टी बनवून काही घटक तेथे भाडे वसुल करत असल्याचेही प्रकार दिसून येतात. त्यामुळे नवी मुंबई शहरामध्ये क्रिडापटू घडविण्यासाठी क्रिडांगणावर सुविधा उपलब्ध करुन देण्यासाठी संबंधितांना देण्याची मागणी हाजी शाहनवाज खान यांनी महापालिका आयुक्तांकडे केली आहे.
