नवी मुंबई : ‘मर्द असाल तर माझ्यासमोर येऊन लढा, दुसऱ्याच्या खांद्यावर बंदूक ठेवून लढू नका,’ असे आव्हान देत आमदार मंदा म्हात्रे यांनी नवी मुंबईतील प्रस्थापितांवर अप्रत्यक्षपणे निशाणा साधला. बेलापूर येथील प्रस्तावित सुपर स्पेशालिटी रुग्णालय व वैद्यकीय महाविद्यालयाच्या जागेवरून सुरू असलेल्या वादाच्या पार्श्वभूमीवर सीबीडी येथे आयोजित पत्रकार परिषदेत त्यांनी ही भूमिका मांडली.
डी बेलापूर सेक्टर–१२ मधील भूखंड क्रमांक ४ वर महापालिकेमार्फत सुपर स्पेशालिटी रुग्णालय उभारण्याचा प्रस्ताव आहे. आमदार म्हात्रे यांच्या पाठपुराव्यानंतर सिडकोने हा भूखंड महापालिकेकडे हस्तांतरित केला. विकास आराखड्यानुसार ही जागा रुग्णालय व वैद्यकीय महाविद्यालयासाठी राखीव असल्याचे महापालिका आयुक्त डॉ. कैलास शिंदे यांनी स्पष्ट केले आहे. मुख्यमंत्री देवेंद्र फडणवीस यांचा या प्रकल्पाला पूर्वीपासून पाठिंबा असल्याचा दावा म्हात्रे यांनी केला आहे.
दरम्यान, संबंधित भूखंडावर स्थानिकांनी विकसित केलेले मैदान असून येथे ‘फोर्टी प्लस’ क्रिकेट सामने व सराव सुरू असतो. परिसरात अन्य मैदान नसल्याने खेळाच्या जागेचा बळी देऊ नये, अशी भूमिका काही नागरिकांनी घेतली आहे. महापालिकेत भाजपला पाठिंबा दिलेले अपक्ष नगरसेवक भरत भोईर यांनी नव्याने समाविष्ट १४ गावांमध्ये आरोग्य सुविधांचा अभाव असल्याचे सांगत रुग्णालय त्या भागात हलवण्याची मागणी केली होती. त्यांच्या भूमिकेला सत्ताधारी भाजपमधील काही सदस्यांचा पाठिंबा मिळाल्याने भाजपच्या आमदारांना थेट भाजपकडूनच विरोध होत असल्याचे चित्र निर्माण झाले आहे.
यावर प्रत्युत्तर देताना म्हात्रे म्हणाल्या, “कुठेही झाले तरी चालेल, पण रुग्णालय होणे गरजेचे आहे. घरातील आईला जशी मुलांची काळजी असते, तशी मला मतदारसंघातील नागरिकांची आहे. महाराष्ट्रात सर्वसामान्यांना परवडणारी आरोग्यसेवा मिळत नाही; म्हणून मी हा प्रकल्प आणला. असे म्हणत रुग्णालयाला जितकी जागा लागते तितकीच जागा द्या. मी तिथे रुग्णालय उभारेन असे त्यांनी म्हटले.
सीबीडी परिसरात सुमारे १२ मैदाने असल्याचा दावा करत त्यांनी विचारले, “या आठ एकर भूखंडाचा भविष्यात कोणाच्या फायद्यासाठी वापर करायचा आहे? ‘फोर्टी प्लस’च्या नावाखाली व्यावसायिक व्यवहार सुरू होते. मोठ्या कंपन्यांकडून पैसे घेतले जातात. तेव्हा कोणी आवाज उठवला नाही.” शाळांना भूखंड देताना पालकमंत्री कोण होते, १७ प्लाझा कोणाच्या आशीर्वादाने उभे राहिले, असे प्रश्न उपस्थित करत त्यांनी याप्रकरणी पडद्याआडून राजकारण करणाऱ्यांवर टीका केली.
“महिला काम करते म्हणून तुमचे नाक कापले जाते का? सभागृहात भाषा वापरताना भान ठेवले पाहिजे. मला कमी लेखू नका; मी कोणाला घाबरत नाही. जखम करा, पण चिमटे काढू नका,” असेही त्या म्हणाल्या.
आमदार मंदा म्हात्रे यांनी घेतलेल्या भूमिकेमुळे नवी मुंबईतील राजकारण अधिकच तापले असून, येत्या काळात वनमंत्री गणेश नाईक विरुद्ध आमदार मंदा म्हात्रे असा सुक्त संघर्ष आता अधिकच भडकण्याची चिन्हे निर्माण झाली आहे. त्यामुळे येत्या काळात याचे नवी मुंबईच्या राजकारणात काय पडसाद उमटतात याकडे सर्वांचे लक्ष लागले आहे.
आरोग्य समितीवर प्रश्नचिन्ह
सोमवारी पार पडलेल्या महापालिकेच्या महासभेत या प्रकल्पाला स्थगिती देऊन प्रस्ताव आरोग्य समितीकडे वर्ग करण्यात आल्यानंतर आमदार म्हात्रे यांनी मंगळवारी पत्रकार परिषद घेऊन आपली भूमिका स्पष्ट केली. आरोग्य समितीकडे वर्ग झालेल्या प्रस्तावावर त्यांनी प्रश्नचिन्ह उपस्थित करत, “रुग्णालय झालेच नाही तर आरोग्य समितीचा प्रश्न येतोच कुठे?” असा सवाल त्यांनी यावेळी उपस्थित केला.
रुग्णालय कोणत्याही परिस्थितीत होणारच अशी आपली भूमिका स्पष्ट करत त्यांनी “या संदर्भात मी मुख्यमंत्र्यांना भेटले आहे. त्यांच्या आशीर्वादाने हे रुग्णालय बेलापूरमध्येच होणार. असल्याचा दावा केला. यावेळी बोलताना, आज माझी किंमत कळणार नाही; पण रुग्णालय सुरू झाल्यावर कळेल, असा विश्वास त्यांनी व्यक्त केला. स्थानिकांना रोजगाराच्या संधी मिळाव्यात यासाठी आयुक्तांशी चर्चा करून नियमावली तयार केली जाईल, असेही त्यांनी स्पष्ट केले.
