नवी मुंबई : नेरूळ सेक्टर सहा, आठ परिसरात एम.एस.ई.डी.सी.एल.सीने विद्युत केबल्स टाकण्यासाठी रस्त्यावर पदपथालगत खोदकाम केलेल्या ठिकाणी तातडीने डांबरीकरण करण्याची मागणी युवा सेनेचे जिल्हा सरचिटणीस निखील मांडवे यांनी महापालिका नेरूळ विभाग अधिकाऱ्यांकडे एका लेखी निवेदनातून केली आहे.
फेब्रुवारी महिन्यात त एम.एस.ई.डी.सी.एल.सीने विद्युत केबल्स टाकण्यासाठी नेरूळ सेक्टर सहा व आठ परिसरातील रस्त्यावर पदपथालगत खोदकाम केलेले आहे. खोदकाम करुन महिना लोटला या ठिकाणी पालिका प्रशासनाकडून अद्यापि खोदकामाच्या ठिकाणी डांबरीकरण करण्यात आलेले नाही. या खोदकामासाठी महापालिका प्रशासनाला एम.एस.ई.डी.सी.एल.सीकडून शुल्क निश्चितच जमा केलेले असणार. या खोदकामामुळे त्या त्या ठिकाणच्या परिसराला बकालपणा प्राप्त झाला आहे. महाराष्ट्रात ठिकठिकाणी गारपीटीसह अवकाळी पावसाला सुरुवात झालेली आहे. डांबरीकरण न झाल्याने रस्त्यावर खाचखळगे निर्माण झालेले आहेत. अनेक गृहनिर्माण सोसायट्यांच्या प्रवेशद्वारालाच बकालपणा आल्याने स्थानिक रहिवाशांना अडचणींचा सामना करावा लागत आहे. समस्येचे गांभीर्य व स्थानिक रहिवाशांना होत असलेला त्रास पाहता संबंधितांना नेरूळ सेक्टर सहा व आठमधील महावितरणने खोदकाम केलेल्या ठिकाणी तातडीने डांबरीकरण करण्याचे निर्देश देण्याची मागणी निखिल मांडवे यांनी महापालिका विभाग अधिकाऱ्यांकडे केली आहे.
महावितरणने रस्त्यावर खोदकाम केलेल्या ठिकाणी डांबरीकरण करण्याची युवा सेनेची मागणी
