सुवर्णा खांडगेपाटील : Navimumbailive.com@gmail.com
नवी मुंबई : महापालिकेच्या वतीने महापौर यांच्या पदनामाने विविध क्रीडा व सांस्कृतिक स्पर्धांचे आयोजन करण्यात येते. या माध्यमातून खेळांना व खेळाडूंना प्रोत्साहन देण्याचे काम सातत्याने केले जात आहे. शहरातील ४०+ वयोमान असलेल्या खेळाडूंना प्रोत्साहन मिळावे व शारीरिकदृष्ट्या तंदुरुस्त रहावे या हेतूने नवी मुंबई महापौर चषक ४०+ क्रिकेट स्पर्धेचे आयोजन २३ मार्च ते २५ मार्च या दरम्यान करण्यात आलेले आहेत.
या स्पर्धेमध्ये ४० वर्षावरील वयोगटाचे नवी मुंबईतील ३० गावांतील ३३ संघ व तसेच शहरी विभागातील २५ संघ सहभागी होणार आहेत. ४०+ क्रिकेट स्पर्धेतील सामने दि. २३ मार्च रोजी सकाळी ९.३० ते २५ मार्च रोजी सायंकाळी ५ वाजता या कालावधीत महानगरपालिका मुख्यालयाजवळील मैदानावर होणार आहेत. या स्पर्धेतील विजयी व उपविजयी संघास आकर्षक चषक तसेच वैयक्तिक उत्तम कामगिरी करणाऱ्या खेळाडूंना स्मृतीचिन्ह देवून गौरविण्यात येणार आहे. तरी या स्पर्धेतील संघाना प्रोत्साहन देणेकरिता नवी मुंबईतील क्रीडाप्रेमींनी जास्तीत जास्त संख्येने उपस्थित रहावे असे आवाहन क्रीडा व सांस्कृतिक कार्यक्रम समितीचे सभापती गिरीश म्हात्रे यांनी केलेले आहे.
