नवी मुंबई : कंत्राटदाराकडून लाच सघेताना रंगेहाथ पकडण्यात आलेले नवी मुंबई महानगरपालिकेचे अतिक्रमण विभागाचे उपायुक्त डॉ. कैलास गायकवाड यांना बेलापूर सत्र न्यायालयाने २४ एप्रिलपर्यंत पोलीस कोठडी सुनावली आहे. बुधवारी दुपारी अडीचच्या सुमारास लाचलुचपत प्रतिबंधक विभागाने (एसीबी) त्यांना न्यायालयात हजर केले. प्रकरणातील आर्थिक व्यवहारांचा मागोवा घेणे, संबंधित कागदपत्रांची तपासणी करणे तसेच इतर संभाव्य संबंधित व्यक्तींचा शोध घेणे आवश्यक असल्याचे नमूद करत सरकारी पक्षाने कोठडीची मागणी केली होती.
डॉ. गायकवाड यांना मंगळवारी, २१ एप्रिल रोजी महापालिका मुख्यालयातील त्यांच्या दालनात कंत्राटदाराकडून ४२ हजार रुपयांची लाच घेताना एसीबीने सापळा रचून पकडले होते. ऐरोली विभागातील अतिक्रमणविरोधी मोहिमेसाठी वाहने उपलब्ध करून देणाऱ्या कंत्राटदाराचे सुमारे २१ लाख रुपयांचे प्रलंबित बिल मंजूर करण्यासाठी आणि धनादेशावर स्वाक्षरी करण्यासाठी ही रक्कम मागितल्याचा आरोप त्यांच्यावर आहे. कंत्राटदाराच्या तक्रारीची पडताळणी करून एसीबीने कारवाई केली.
अटकेनंतर एसीबीच्या पथकाने गायकवाड यांच्या निवासस्थानी रात्रभर झडती घेतली. या झडतीत ३८ तोळे सोन्याचे दागिने आणि सुमारे अडीच लाख रुपयांची रोख रक्कम हस्तगत करण्यात आली. तसेच गायकवाड व त्यांच्या पत्नीच्या नावावर प्रत्येकी एक अशा दोन सदनिकांची कागदपत्रे मिळाली आहेत. या मालमत्तेचे स्रोत, आर्थिक व्यवहार आणि उत्पन्नाशी त्याचा संबंध याबाबत तपास सुरू असल्याची माहिती अधिकाऱ्यांनी दिली.
अतिक्रमण विभागाचे उपायुक्त डॉ. कैलास गायकवाड यांना २४ एप्रिलपर्यंत कोठडी
