युवा सेनेचे नवी मुंबई जिल्हा सरचिटणिस निखिल मांडवे यांचे पालिका आयुक्तांना निवेदन
नवी मुंबई : प्रभाग २३ मधील गृहनिर्माण सोसायटींना कचऱ्याचे डबे उपलब्ध करुन देण्याची मागणी युवा सेनेचे नवी मुंबई जिल्हा सरचिटणिस निखिल मांडवे यांनी महापालिका आयुक्त कैलास शिंदे यांच्याकडे एका लेखी निवेदनातून केली आहे.
महापालिका प्रभाग २३ मधील सारसोळे गाव आणि सेक्टर सहा, आठ, सेक्टर दहामधील गृहनिर्माण सोसायटींकडून कचऱ्याच्या डब्याची मागणी केली जात आहे. अधिकांश सोसायटींचे कचऱ्याचे डबे तुटलेल्या अवस्थेत असल्याने सकाळी महापालिकेची कचरा संकलन करणारी गाडी आल्यावर भरलेला डबा कचरा संकलन वाहनाकडे घेवून जाताना व परत आणताना तुटलेल्या डब्यातून कचरा पडतो. त्यामुळे सोसायटी आवारात व प्रवेशद्वारावरच कचरा पसरल्यामुळे दुर्गंधी पसरते व बकालपणा पहावयास मिळतो. नवी मुंबई महापालिकेला स्वच्छतेच्या बाबतीत केंद्र व राज्य सरकारचे सातत्याने पुरस्कार मिळत असल्याने गृहनिर्माण सोसायटीच्या प्रवेशद्वारावर व अंर्तगत भागात कचरा विखुरल्याने नवी मुंबईच्या स्वच्छतेला विघ्न निर्माण झाले आहे. त्यामुळे प्रभाग २३ मधील गृहनिर्माण सोसायटींना तातडीने कचऱ्याचे डबे वितरीत करण्याचे संबंधितांना निर्देश देण्याची मागणी निखिल मांडवे यांनी महापालिका आयुक्तांकडे केली आहे.