‘कॅप्टन’ ते ‘भोंदूबाबा’… अशोक खरातच्या साम्राज्याचा पर्दाफाश!

अनंतकुमार गवई : Navimumbailive.com@gmail.com

महिलांच्या शोषणापासून आर्थिक फसवणुकीपर्यंत आरोप

राजकीय कनेक्शनच्या चर्चेने खळबळ

पत्नी कल्पना खरातला कधी दिलासा तर कधी कायदेशीर धक्का

आता ईडीची ३६.९० कोटींच्या मालमत्तेवर कारवाई

मुंबई : अध्यात्म, ज्योतिष आणि दैवी शक्तीच्या नावाखाली लोकांवर प्रभाव निर्माण करणाऱ्या अशोककुमार एकनाथ खरात उर्फ ‘कॅप्टन’विरोधातील प्रकरणाने २०२६ मध्ये महाराष्ट्राच्या राजकारणापासून पोलीस तपास आणि ईडीच्या कारवाईपर्यंत मोठे वळण घेतले आहे. महिलांचे लैंगिक शोषण, फसवणूक, खंडणी, अंधश्रद्धा पसरवणे आणि आर्थिक गैरव्यवहार असे गंभीर आरोप त्याच्यावर आहेत. या प्रकरणाचा तपास पुढे जात असताना त्याचे कथित राजकीय संबंध आणि आर्थिक व्यवहारही तपास यंत्रणांच्या रडारवर आले आहेत.

अशोक खरात स्वतःला दैवी शक्ती असलेला व्यक्ती म्हणून सादर करत असल्याचा तपास यंत्रणांचा आरोप आहे. तो स्वतःला भगवान शिवाचा अवतार असल्याचे सांगत असे आणि भविष्यवाणी, धार्मिक विधी, आध्यात्मिक उपाय व भीतीचे वातावरण निर्माण करून लोकांवर प्रभाव टाकत असल्याचे तपासात समोर आले.

ईडीच्या अधिकृत तपासानुसार, कथित धार्मिक व आध्यात्मिक पद्धतींच्या आडून भीती निर्माण करून पैसे आणि मालमत्ता उकळल्याचा आरोप आहे. एका प्रकरणात एका तक्रारदाराकडून सुमारे ५.६२ कोटींचा कथित फायदा झाल्याचे ईडीने नमूद केले आहे. यात महागडी मर्सिडीज, परदेश दौरे, अमेरिकेतील वैद्यकीय उपचार आणि फार्महाऊसच्या कामांवरील खर्चाचा समावेश असल्याचे ईडीचे म्हणणे आहे.

महिला शोषणाचे आरोप; एकामागून एक गुन्हे

खरातविरोधात महिलांच्या लैंगिक शोषणाशी संबंधित अनेक गुन्हे दाखल झाल्याचे एसआयटीच्या तपासात उघड झाले आले. एका विवाहित महिलेने केलेल्या तक्रारीनंतर प्रकरणाला मोठे वळण मिळाले. धार्मिक विधी आणि भविष्य सांगण्याच्या नावाखाली तिच्यावर दीर्घकाळ अत्याचार केल्याचा आरोप करण्यात आला. याच प्रकरणात जबरदस्तीने गर्भपात घडवून आणल्याचाही गंभीर आरोप तक्रारीत करण्यात आला. मात्र हे सर्व आरोप न्यायालयीन प्रक्रियेत सिद्ध होणे बाकी आहे. एसआयटीने तपासाचा विस्तार करताना खरातविरोधात एकूण आठ गुन्ह्यांचा तपास सुरू असल्याचे एप्रिल २०२६ मध्ये सांगितले होते.

फरार ते अटक… खरातच्या अडचणी वाढत गेल्या

प्रकरण उघडकीस आल्यानंतर खरातला पोलिसांनी अटक केली. त्यानंतर वेगवेगळ्या गुन्ह्यांमध्ये त्याला पुन्हा ताब्यात घेण्यात आले. एका टप्प्यावर दुसऱ्या गुन्ह्यातही त्याची अटक निश्चित झाल्याचे न्यायालयीन वृत्तांतून समोर आले. तपासादरम्यान त्याला पोलीस कोठडी, त्यानंतर न्यायालयीन कोठडी अशा प्रक्रियेतून जावे लागले. एसआयटीने त्याच्या आर्थिक व्यवहारांसह विविध प्रकरणांचा स्वतंत्रपणे तपास सुरू ठेवला. मे २०२६ मध्ये ईडीनेही त्याला पीएमएलएअंतर्गत अटक केली. ईडीच्या माहितीनुसार, १९ मे २०२६ रोजी अशोक खरातला अटक करण्यात आली आणि तो सध्या न्यायालयीन कोठडीत आहे.

 पत्नी कल्पना खरात : फरार, जामीन अर्ज आणि नंतरचा कायदेशीर दिलासा

अशोक खरातची पत्नी कल्पना खरात हिचे नावही तपासात समोर आले. तिच्यावर आर्थिक व्यवहार आणि जमीन फसवणुकीशी संबंधित प्रकरणात सहभागाचा आरोप करण्यात आला. ३१ मार्च २०२६ नंतर ती पोलिसांना सापडली नसल्याने तिच्या शोधासाठी पोलिसांची पथके रवाना करण्यात आली होती आणि लूकआऊट नोटीसही जारी करण्यात आली. एप्रिलमध्ये राहाता न्यायालयाने एका प्रकरणात तिचा अटकपूर्व जामीन अर्ज फेटाळला. तपास यंत्रणांनी तिच्या बँक खात्यांमधील व्यवहार आणि मालमत्तेशी संबंधित बाबींचा मुद्दा उपस्थित केला होता. तिच्या वतीने मात्र पतीच तिची बँक खाती चालवत असल्याचा युक्तिवाद करण्यात आला. मात्र त्यानंतरच्या न्यायालयीन प्रक्रियेत तिला एका सिन्नर फसवणूक प्रकरणात २५ जून २०२६ रोजी सशर्त अटकपूर्व जामीन मंजूर झाला. याशिवाय मुंबई उच्च न्यायालयाच्या औरंगाबाद खंडपीठात तिच्या अटकपूर्व जामीन अर्जावर ६ मे रोजी नोटीस काढण्यात आली होती आणि पुढील सुनावणीची प्रक्रिया सुरू होती.

एसआयटीचा तपास निर्णायक टप्प्यात

राज्य सरकारने या प्रकरणासाठी विशेष तपास पथक म्हणजेच एसआयटी स्थापन केली. तपासाचे नेतृत्व वरिष्ठ पोलीस अधिकारी तेजस्वी सातपुते यांच्याकडे देण्यात आले. मे २०२६ पर्यंत एसआयटीने १०५ हून अधिक साक्षीदारांची चौकशी केल्याची माहिती समोर आली. तपासातील पहिल्या दोन गुन्ह्यांमध्ये तब्बल १,२०० पानी आरोपपत्र न्यायालयात दाखल करण्यात आल्याचेही वृत्त आहे. उर्वरित गुन्ह्यांमध्येही आरोपपत्र दाखल करण्याची प्रक्रिया सुरू असल्याचे सांगण्यात आले. यामुळे हे प्रकरण केवळ एका व्यक्तीविरोधातील तक्रारीपुरते राहिले नसून आर्थिक व्यवहार, मालमत्ता, कथित सहकारी पतसंस्था, बँक खाती आणि इतर व्यक्तींच्या भूमिकेपर्यंत तपास पोहोचला आहे.

 ईडीचा प्रवेश आणि कोट्यवधींच्या मालमत्तेवर टाच

ईडीने १९ मे रोजी अशोक खरातला पीएमएलएअंतर्गत अटक केली. त्यानंतर १५ जुलै २०२६ रोजी आरोपी आणि त्याच्या कुटुंबीयांच्या नावावर असलेल्या १९.२० कोटींच्या स्थावर मालमत्तेवर तात्पुरती जप्तीची कारवाई केली. यानंतर १७ जुलै रोजी ईडीने अशोक खरात, त्याची पत्नी कल्पना खरात आणि अन्य चार व्यक्तींविरोधात मुंबईतील विशेष पीएमएलए न्यायालयात अभियोजन तक्रार दाखल केली.

ईडीच्या अधिकृत माहितीनुसार, या प्रकरणात आतापर्यंत सुमारे ३६.९० कोटींची मालमत्ता जप्त, अटॅच किंवा फ्रीझ करण्यात आली आहे.

‘पैसा कुठून आला आणि कुठे गेला?’—ईडीसमोर मोठा प्रश्न

ईडीच्या तपासात पैसा विविध बँक खाती, सहकारी पतसंस्था, मालमत्ता आणि कथित बेनामी खात्यांमधून फिरवल्याचा आरोप आहे. ईडीने म्हटले आहे की, कथित गुन्ह्यातून मिळालेल्या पैशाचे विविध खात्यांमधून लेअरिंग करण्यात आले आणि काही मालमत्ता तसेच प्रॉक्सी खात्यांचा वापर करण्यात आल्याचा संशय आहे. त्यामुळे आता तपासाचा केंद्रबिंदू केवळ ‘खरातने काय केले?’ एवढाच राहिलेला नाही. त्याच्याकडे पैसा कसा आला, कोणाकडून आला, कोणाच्या माध्यमातून फिरवला गेला आणि या आर्थिक साखळीत आणखी कोण सहभागी होते? हे प्रश्न महत्त्वाचे झाले आहेत. अशोक खरात ईडीच्या पीएमएलए प्रकरणात न्यायालयीन कोठडीत आहे. त्याच्याविरोधात दाखल केलेल्या मूळ गुन्ह्यांमध्ये एसआयटीचा तपास आणि न्यायालयीन प्रक्रिया सुरू आहे.

दुसरीकडे, ईडीने जुलैमध्ये अभियोजन तक्रार दाखल केल्यामुळे आर्थिक गैरव्यवहाराच्या आरोपांना स्वतंत्र कायदेशीर दिशा मिळाली आहे. मालमत्ता जप्ती, बँक व्यवहार आणि कथित बेनामी खात्यांचा तपास पुढे कोणते नवे चेहरे समोर आणतो, याकडे लक्ष लागले आहे.

एसआयटी आणि ईडीच्या तपासातून सत्य बाहेर येणार

अशोक खरात प्रकरण आता केवळ ‘भोंदूबाबाच्या कारनाम्यां’पुरते मर्यादित राहिलेले नाही. महिलांच्या शोषणाचे आरोप + फसवणूक + खंडणीचे आरोप + अंधश्रद्धेचा वापर + आर्थिक व्यवहार + मालमत्ता + कथित राजकीय संपर्क + ईडीची मनी लाँडरिंग कारवाई असा या प्रकरणाचा विस्तार झाला आहे. खरातच्या कथित आर्थिक साम्राज्याचा खरा आकार किती?, राजकीय आणि प्रशासकीय संपर्कांचा त्याच्या व्यवहारांशी नेमका संबंध किती?, आणि या संपूर्ण जाळ्यात खरातशिवाय आणखी कोणकोण सहभागी आहेत? या प्रश्नांची उत्तरे एसआयटी आणि ईडीच्या पुढील तपासातून उत्तरे मिळण्याची शक्यता आहे. मात्र अंतिम सत्य न्यायालयीन प्रक्रियेतच निश्चित होईल.