महापौर सुजाताताई पाटील यांच्या हस्ते रिक्षा-टॅक्सी चालकांच्या हाती मराठीचे प्रमाणपत्र

श्रीकांत पिंगळे : Navimumbailive.com@gmail.com

रिक्षा-टॅक्सी चालकांच्या हाती मराठीचे प्रमाणपत्र!

महापौर सुजाता पाटील यांच्या हस्ते शेकडो चालकांचा गौरव

‘मराठी शिकूया, संवाद वाढवूया’ उपक्रमाला उत्स्फूर्त प्रतिसाद

नवी मुंबई : महाराष्ट्राच्या मातीत व्यवसाय करताना मराठी भाषेचे ज्ञान असणे आणि प्रवाशांशी मराठीत सहज संवाद साधता यावा, या उद्देशाने नवी मुंबईतील रिक्षा व टॅक्सी चालकांसाठी राबविण्यात आलेल्या मराठी भाषा शिकवणी, परीक्षा आणि प्रमाणपत्र वितरण उपक्रमाचा शेकडो चालकांनी लाभ घेतला. या उपक्रमांतर्गत मराठी भाषा परीक्षा उत्तीर्ण झालेल्या रिक्षा व टॅक्सी चालकांना नवी मुंबई महानगरपालिकेच्या महापौर सौ. सुजाताताई पाटील यांच्या हस्ते प्रमाणपत्रांचे वितरण करण्यात आले.

नवी मुंबई रिक्षा चालक-मालक सेवाभावी संस्था आणि शिव वाहतूक सेना, नवी मुंबई यांच्या वतीने तसेच जिल्हाध्यक्ष दिलीप आमले आणि अंकिता मोटार ट्रेनिंग स्कूलच्या संचालिका संगिता दिलीप आमले यांच्या संकल्पनेतून हा अभिनव उपक्रम राबविण्यात आला.

कार्यक्रमाला प्रमुख पाहुणे म्हणून प्रादेशिक परिवहन अधिकारी दत्तात्रेय सागोळकर, सहाय्यक प्रादेशिक परिवहन अधिकारी चंद्रमोहन चितल, नेरूळ पोलीस ठाण्याचे गुन्हे निरीक्षक पंकज धाडगे, मराठी भाषा शिक्षक व मार्गदर्शक डॉ. अमृत पाटील, लेखक, पत्रकार व साहित्यिक गजानन म्हात्रे यांची उपस्थिती होती. यावेळी नवी मुंबईतील शेकडो रिक्षा व टॅक्सी चालक सहभागी झाले होते.

मराठीशी नाते जोडणारा उपक्रम

कार्यक्रमाची सुरुवात आयोजक दिलीप आमले यांनी उपस्थित मान्यवर, अधिकारी, पोलीस अधिकारी, शिक्षक, लेखक, पत्रकार, साहित्यिक तसेच रिक्षा-टॅक्सी चालकांचे स्वागत करून केली. त्यानंतर मराठी भाषा शिकवणी व परीक्षा पूर्ण करून उत्तीर्ण झालेल्या चालकांना महापौर सुजाताताई पाटील यांच्या हस्ते प्रमाणपत्रांचे वितरण करण्यात आले.

यावेळी बोलताना महापौर सुजाताताई पाटील यांनी मराठी भाषा ही केवळ संवादाचे माध्यम नसून महाराष्ट्राच्या संस्कृतीशी आणि अस्मितेशी जोडणारा महत्त्वाचा दुवा असल्याचे अधोरेखित केले. नवी मुंबईत विविध राज्यांतून आलेले नागरिक वास्तव्यास असून, रिक्षा व टॅक्सी चालकांचा दररोज हजारो प्रवाशांशी संपर्क येतो. त्यामुळे चालकांना मराठीचे ज्ञान मिळाल्यास प्रवासी आणि चालक यांच्यातील संवाद अधिक सुलभ आणि आपुलकीचा होण्यास मदत होईल, असा संदेश या उपक्रमातून देण्यात आला.

प्रवाशांशी संवादासाठी मराठीचा उपयोग

नवी मुंबईतील रिक्षा व टॅक्सी चालकांना मराठी भाषा शिकण्यासाठी प्रोत्साहन देणे, प्रवाशांशी मराठीत सहज संवाद साधता यावा आणि महाराष्ट्रात काम करणाऱ्या चालकांना स्थानिक भाषा व संस्कृतीशी जोडणे, हा या उपक्रमाचा मुख्य उद्देश आहे. मराठी शिकण्यासाठी चालकांनी दाखविलेला उत्साह आणि परीक्षा देऊन प्रमाणपत्र मिळविण्याची घेतलेली मेहनत कौतुकास्पद असल्याचे उपस्थित मान्यवरांनी सांगितले.

रिक्षा व टॅक्सी चालक हे शहरातील नागरिक आणि प्रवाशांच्या दैनंदिन जीवनाचा अविभाज्य भाग आहेत. त्यामुळे त्यांच्या माध्यमातून मराठी भाषेचा वापर दैनंदिन व्यवहारात अधिक वाढावा, या दृष्टीने हा उपक्रम महत्त्वपूर्ण ठरत असल्याचे आयोजकांनी सांगितले.

विविध क्षेत्रातील मान्यवरांचा सहभाग

कार्यक्रमाच्या यशस्वी आयोजनासाठी सौ. संगिता दाते, मगर मॅडम, रवी नचितै आणि सोनू ठाकूर यांनी विशेष सहकार्य केले. त्यांच्या सहकार्याबद्दल आयोजकांच्या वतीने आभार व्यक्त करण्यात आले.

मराठी भाषा शिकून परीक्षा उत्तीर्ण झालेल्या शेकडो रिक्षा आणि टॅक्सी चालकांच्या चेहऱ्यावर प्रमाणपत्र मिळाल्याचा आनंद दिसून येत होता. मराठी शिकण्याची इच्छा, स्थानिक नागरिकांशी आपुलकीने संवाद साधण्याची तयारी आणि महाराष्ट्राच्या भाषेशी जोडले जाण्याची भावना या उपक्रमातून अधोरेखित झाली.

महापौर सुजाताताई पाटील यांचे मार्गदर्शन ठरले लाखमोलाचे

महापौर सुजाताताई पाटील यांच्या हस्ते प्रमाणपत्र वितरण झाल्याने कार्यक्रमाला विशेष महत्त्व प्राप्त झाले. नवी मुंबईत विविध भाषिक समाज घटकांमध्ये संवाद आणि सलोखा वाढविण्यासाठी अशा उपक्रमांना प्रोत्साहन देण्याची गरज यावेळी व्यक्त करण्यात आली.