महापौर मॅडमला एक कॉल अन् अंधाराचा प्रश्न ‘सॉल’!

स्वयंम न्यूज ब्युरो : Navimumbailive.com@gmail.com

सुजाताताई पाटील यांच्या तत्परतेने नेरूळ सेक्टर ६ मधील राजमाता जिजाऊ उद्यान, क्रीडांगण अन् रस्ता काही मिनिटांत प्रकाशमय

नागरिकांच्या सुरक्षिततेचा प्रश्न ओळखून महापौरांनी महापालिका-महावितरण यंत्रणा हलवली; कामातून दाखवली कार्यतत्परता

नवी मुंबई : नागरिकांच्या रोजच्या आयुष्यातील एखादी छोटीशी वाटणारी समस्या वेळेत सोडवली नाही, तर त्याचे रूपांतर मोठ्या गैरसोयीत किंवा सुरक्षेच्या प्रश्नात होऊ शकते. विशेषतः रात्रीच्या वेळी सार्वजनिक उद्यान, क्रीडांगण आणि रहदारीच्या मार्गावर प्रकाशव्यवस्था बंद असणे हा केवळ वीजपुरवठ्याचा प्रश्न राहत नाही, तर तो थेट नागरिकांच्या सुरक्षिततेशी जोडला जातो. नेरूळ सेक्टर ६ येथे गुरुवारी अशीच परिस्थिती निर्माण झाली; मात्र नागरिकांनी महापौर सौ. सुजाताताई पाटील यांच्याशी संपर्क साधताच अवघ्या काही मिनिटांत परिसर पुन्हा प्रकाशमय झाला.

नेरूळ सेक्टर ६ मधील महापालिकेच्या राजमाता जिजाऊ उद्यानातील हायमस्ट बंद असल्याने गुरुवारी सायंकाळपासून उद्यान परिसर, क्रीडांगण तसेच सागरदीप सोसायटीकडून वरुणा सोसायटीकडे जाणाऱ्या मार्गावर पूर्णपणे अंधाराचे साम्राज्य पसरले होते. सायंकाळच्या वेळेत या परिसरात नागरिकांची मोठी वर्दळ असते. मुले क्रीडांगणाचा वापर करतात, ज्येष्ठ नागरिक उद्यानात फिरण्यासाठी येतात, तर महिला व इतर नागरिक या मार्गाने ये-जा करतात. अशा परिस्थितीत प्रकाशव्यवस्था बंद पडल्याने नागरिकांमध्ये अस्वस्थता निर्माण झाली होती.

त्यातच या परिसरात रात्रीच्या वेळी नशेखोरांचा वावर असल्याने अंधारामुळे सुरक्षेची चिंता अधिकच वाढली होती. त्यामुळे स्थानिक नागरिकांनी परिस्थितीचे गांभीर्य लक्षात घेऊन थेट महापौर सौ. सुजाताताई पाटील यांच्याशी मोबाईलवर संपर्क साधला आणि बंद असलेल्या हायमस्टमुळे निर्माण झालेल्या परिस्थितीची माहिती दिली.

फोन आला आणि महापौरांनी यंत्रणा कामाला लावली!

नागरिकांकडून माहिती मिळताच महापौर सुजाताताई पाटील यांनी समस्या पुढे ढकलण्याऐवजी तातडीने तिची दखल घेतली. त्यांनी संबंधित महापालिका यंत्रणेशी तसेच महावितरणच्या अधिकाऱ्यांशी संपर्क साधून हायमस्ट तात्काळ सुरू करण्यासाठी पाठपुरावा केला. महापौरांच्या तत्पर हस्तक्षेपानंतर संबंधित यंत्रणा कामाला लागली आणि अवघ्या काही मिनिटांत बंद असलेला हायमस्ट सुरू करण्यात आला. हायमस्ट सुरू होताच राजमाता जिजाऊ उद्यान, क्रीडांगण आणि सागरदीप सोसायटीकडून वरुणा सोसायटीकडे जाणारा मार्ग पुन्हा प्रकाशाने उजळून निघाला.

एकीकडे नागरिकांच्या सुरक्षिततेचा प्रश्न निर्माण झालेला असताना दुसरीकडे त्यावर तातडीने उपाययोजना झाल्याने स्थानिक नागरिकांना मोठा दिलासा मिळाला.

प्रकाशाचा प्रश्न; पण महापौरांसाठी तो नागरिकांच्या सुरक्षेचा प्रश्न!

सार्वजनिक ठिकाणी प्रकाशव्यवस्था ही केवळ सौंदर्य किंवा सुविधा नसून सुरक्षिततेचा अत्यंत महत्त्वाचा घटक आहे. विशेषतः उद्यान आणि क्रीडांगण परिसरात महिला, लहान मुले आणि ज्येष्ठ नागरिकांची ये-जा असते. रस्ता अंधारात असल्यास अपघाताबरोबरच गैरप्रकार घडण्याची शक्यता वाढू शकते.

ही बाब लक्षात घेऊन महापौर सुजाताताई पाटील यांनी हायमस्ट बंद असल्याच्या तक्रारीकडे केवळ एक तांत्रिक बिघाड म्हणून न पाहता नागरिकांच्या सुरक्षिततेशी संबंधित समस्या म्हणून तातडीने हाताळली, ही बाब स्थानिक पातळीवर विशेष चर्चेचा विषय ठरली आहे.

‘एक कॉल आणि प्रॉब्लेम सॉल’चा नुसता दावा नाही; कृतीतून प्रत्यय!

सध्या सोशल मीडियाच्या युगात एखाद्या छोट्या कामाचेही श्रेय घेण्यासाठी पोस्ट, बॅनर, फोटो आणि प्रसिद्धीचा मोठा गाजावाजा केला जातो. ‘एक कॉल आणि प्रॉब्लेम सॉल’ अशी स्वतःची प्रसिद्धी करून घेणारे अनेकजण दिसतात. मात्र नेरूळ सेक्टर ६ मधील या घटनेत महापौर सुजाताताई पाटील यांनी कोणताही गाजावाजा न करता नागरिकांचा फोन घेतला, समस्या समजून घेतली, संबंधित दोन यंत्रणांशी संपर्क साधला आणि काही मिनिटांत प्रत्यक्ष समस्या सोडवून दाखवली.

यामुळे ‘काम करणाऱ्याला प्रसिद्धीची गरज नसते; कामच त्याची ओळख निर्माण करते’, याचा प्रत्यय या घटनेतून आला आहे. महापौरांच्या या तत्पर कार्यशैलीमुळे नागरिकांमध्येही सकारात्मक भावना निर्माण झाली आहे. नागरिकांनी केवळ तक्रार नोंदवून ती प्रलंबित राहण्याऐवजी थेट लोकप्रतिनिधीशी संवाद साधला आणि लोकप्रतिनिधीनेही त्याला तितक्याच तत्परतेने प्रतिसाद दिला, यामुळे लोकप्रतिनिधी आणि नागरिक यांच्यातील थेट संवादाचे महत्त्वही अधोरेखित झाले.

नागरिकांकडून सुजाताताईंचे आभार

हायमस्ट पुन्हा सुरू झाल्यानंतर उद्यान, क्रीडांगण आणि रस्त्यावरील अंधार दूर झाला. त्यामुळे परिसरातील नागरिकांनी महापौर सौ. सुजाताताई पाटील यांचे आभार मानत त्यांच्या तत्परतेचे आणि कार्यक्षमतेचे कौतुक केले.

विशेष म्हणजे, समस्या किती मोठी आहे यापेक्षा ती समस्या नागरिकांसाठी किती महत्त्वाची आहे, हे ओळखून त्यावर तातडीने कृती करणे हीच प्रभावी लोकप्रतिनिधित्वाची खरी ओळख मानली जाते. नेरूळ सेक्टर ६ मधील घटनेत सुजाताताई पाटील यांनी हीच कार्यपद्धती प्रत्यक्षात दाखवून दिली.