जुन्नरकर वृत्तसेवा : Navimumbailive.com@gmail.com
५२९ आशा सेविकांना साडेसात हजारांचा विशेष नागरी भत्ता देण्याचे निर्देश
जनता दरबारात प्रश्न मार्गी लावण्यासाठी तातडीने प्रशासनाला सूचना
नवी मुंबई : नवी मुंबईच्या सार्वजनिक आरोग्य व्यवस्थेत महत्त्वाची भूमिका बजावणाऱ्या आशा सेविकांच्या आर्थिक प्रश्नासाठी वनमंत्री नामदार गणेश नाईक यांनी ठोस पुढाकार घेतला आहे. गेल्या अनेक वर्षांपासून विविध आरोग्यविषयक योजनांची जबाबदारी समर्थपणे पार पाडणाऱ्या महापालिकेतील ५२९ आशा सेविकांना साडेसात हजार रुपयांचा विशेष नागरी भत्ता लागू करण्याचे निर्देश गणेश नाईक यांनी दिले.
वाशी येथे शुक्रवारी झालेल्या जनता दरबारात श्रमिक सेनेच्या माध्यमातून आशा सेविकांनी आपल्या प्रलंबित मागण्यांचे निवेदन मंत्री गणेश नाईक यांना दिले. आशा सेविकांचे म्हणणे ऐकून घेतल्यानंतर ना. नाईक यांनी तातडीने दखल घेत महापौर सुजाता पाटील यांच्याशी दूरध्वनीवरून संपर्क साधला आणि आगामी सर्वसाधारण सभेत विशेष नागरी भत्त्याचा प्रस्ताव मंजूर करण्याच्या सूचना दिल्या.
२००७ पासून या आशा सेविका महापालिकेच्या आरोग्य विभागामार्फत राबविण्यात येणाऱ्या विविध योजनांमध्ये काम करत आहेत. नागरिकांच्या आरोग्यविषयक जनजागृतीपासून ते कुष्ठरोग आणि कर्करोग सर्वेक्षणापर्यंत विविध जबाबदाऱ्या त्या पार पाडत आहेत. मात्र, एवढ्या प्रदीर्घ काळानंतरही त्यांना महापालिकेकडून कोणताही विशेष भत्ता मिळत नसल्याची बाब ना. नाईक यांच्या निदर्शनास आणून देण्यात आली.
या प्रश्नाची गांभीर्याने दखल घेत ‘सफाई कर्मचाऱ्यांप्रमाणेच आशा सेविकांनाही न्याय मिळाला पाहिजे’, या भूमिकेतून नाईक यांनी महासभेत प्रस्ताव आणण्याच्या सूचना दिल्या. काही दिवसांपूर्वी त्यांच्या सूचनेनुसार महापालिकेतील कंत्राटी सफाई कर्मचाऱ्यांना साडेसात हजार रुपयांचा विशेष नागरी भत्ता लागू करण्यात आला आहे.
आशा सेविकांच्या मागणीला तातडीने प्रतिसाद देत त्यांच्या आर्थिक हितासाठी पुढाकार घेतल्याने मंत्री गणेश नाईक यांच्या जनता दरबारातील कार्यपद्धतीचे पुन्हा एकदा दर्शन घडले आहे. आता आगामी महासभेतील निर्णयाकडे ५२९ आशा सेविकांचे लक्ष लागले आहे.
