जुन्नरकर वृत्तसेवा : Navimumbailive.com@gmail.com
नवी मुंबई : सिडकोच्या “माझे पसंतीचे सिडकोचे घर – माझा 1st चॉइस” गृहनिर्माण योजनेतील आर्थिकदृष्ट्या दुर्बल घटकाच्या ४ हजार ७७९ सदनिकांची संगणकीय सोडत शुक्रवार, दि. ११ सप्टेंबर २०२६ रोजी सिडको भवन, सीबीडी बेलापूर येथे संपन्न झाली. यावेळी शान्तनु गोयल, सहव्यवस्थापकीय संचालक गणेश देशमुख, सहव्यवस्थापकीय संचालक, सुरेश मेंगडे, मुख्य दक्षता अधिकारी; लक्ष्मीकांत गरजे, संचालक (आयटी), एनआयसी, नरेंद्र भामरे, संचालक (आयटी), एनआयसी; श्रीनिवास मोकळीकर, पणन व्यवस्थापक (गृहनिर्माण) तसेच सिडकोचे वरिष्ठ अधिकारी उपस्थित होते.
सिडकोतर्फे दि. १५ ऑगस्ट २०२६ रोजी या गृहनिर्माण योजनेचा प्रारंभ करण्यात आला होता. या योजनेअंतर्गत तळोजा सेक्टर-३९ येथे ४ हजार २२९, कळंबोली बस डेपो येथे २५७ आणि खारघर बस डेपो येथे २९३ सदनिका आर्थिकदृष्ट्या दुर्बल घटकासाठी उपलब्ध करून देण्यात आल्या होत्या. योजनेतील काही सदनिका या दिव्यांग अर्जदारांसाठी राखीव होत्या. या संगणकीय सोडतीमध्ये एकूण ३ हजार १४२ अर्जदार विजेते ठरले आहेत. सोडत पूर्णतः पारदर्शक व मानवी हस्तक्षेपविरहित पद्धतीने पार पडली असून यशस्वी अर्जदारांची यादी www.cidcohomes.com या संकेतस्थळावर प्रसिद्ध करण्यात आली आहे.
या गृहनिर्माण योजनेद्वारे विजेत्या अर्जदारांचे नवी मुंबईसारख्या आंतरराष्ट्रीय दर्जाच्या शहरात घर घेण्याचे स्वप्न साकार झाले आहे.
कोट
“सिडकोच्या ‘माझे पसंतीचे सिडकोचे घर – माझा 1st चॉइस’ या गृहनिर्माण योजनेला नागरिकांचा उत्स्फूर्त प्रतिसाद लाभला आहे. आर्थिकदृष्ट्या दुर्बल घटकातील नागरिकांना नवी मुंबईसारख्या नियोजित व जागतिक दर्जाच्या शहरात परवडणाऱ्या दरात स्वतःचे घर उपलब्ध करून देणे, हा सिडकोच्या गृहनिर्माण उपक्रमांचा प्रमुख उद्देश आहे. या संगणकीय सोडतीच्या माध्यमातून पात्र लाभार्थ्यांचे गृहस्वप्न साकार होत असून, पारदर्शकता, कार्यक्षमता आणि सर्वसमावेशक गृहनिर्माणाच्या दिशेने सिडकोची वाटचाल सुरू आहे.”
श्री. अश्विन मुदगल, भा.प्र.से.
उपाध्यक्ष तथा व्यवस्थापकीय संचालक, सिडको
