घरमालकाचा टॅक्स थकीत म्हणून विद्यार्थ्यांची शिष्यवृत्ती रोखणार? आयुक्त कैलास शिंदे साहेब, विद्यार्थ्यांचा काय दोष?

महादेव पवार यांचा संतप्त सवाल!

स्वयंम न्यूज ब्युरो : Navimumbailive.com@gmail.com

नवी मुंबई : घरमालकाने मालमत्ता कर आणि पाणी बिल भरले नाही, तर त्याची शिक्षा भाड्याने राहणाऱ्या विद्यार्थ्यांना का? नवी मुंबई महानगरपालिकेच्या शिष्यवृत्तीसाठी लावण्यात आलेल्या या जाचक अटीवर शिवसैनिक महादेव पवार यांनी तीव्र नाराजी व्यक्त केली आहे. ही अट तातडीने रद्द करण्याची मागणी त्यांनी आयुक्त श्री. कैलास शिंदे यांच्याकडे केली आहे.

आज घरांच्या वाढत्या किमतींमुळे सामान्य नागरिकांना भाड्याच्या घरात राहावे लागत आहे. अशा परिस्थितीत घरमालकाने कर किंवा पाणी बिल भरले नाही, तर त्यात विद्यार्थ्यांचा काय दोष? थकबाकीदार घरमालकांवर कारवाई करण्याचे अधिकार महानगरपालिकेला असताना विद्यार्थ्यांच्या शिष्यवृत्तीची अडवणूक कशासाठी, असा सवाल महादेव पवार यांनी उपस्थित केला.

एकीकडे अनधिकृत बॅनर लावून लाखो रुपयांचा जाहिरात कर बुडवला जात असल्याच्या तक्रारींकडे दुर्लक्ष होत असल्याचा आरोप केला जात आहे, तर दुसरीकडे शिक्षणासाठी मदतीची गरज असलेल्या विद्यार्थ्यांना जाचक अटींचा फटका बसत आहे. मग कर बुडवणाऱ्यांवर कठोर कारवाई कधी होणार आणि विद्यार्थ्यांनाच नियमांच्या कचाट्यात का अडकवले जात आहे? असा संतप्त सवाल पवार यांनी केला.

महानगरपालिकेने विद्यार्थ्यांचे भविष्य लक्षात घेऊन ही अट तातडीने रद्द करावी, पर्यायी कागदपत्रांच्या आधारे शिष्यवृत्ती मंजूर करावी आणि घरमालकाच्या थकबाकीचा फटका विद्यार्थ्यांना बसू देऊ नये, अशी मागणी त्यांनी केली आहे.

महादेव पवार यांचा इशारा

“घरमालकाचा कर थकीत असेल, तर घरमालकावर कारवाई करा; विद्यार्थ्यांची शिष्यवृत्ती रोखून त्यांच्या भविष्याशी खेळू नका! विद्यार्थ्यांना न्याय मिळालाच पाहिजे!”