शिवसेना कणकवली तालुक्याच्या वतीने भव्य बचतगट दीपावली महोत्सव २०२६
आमदार नीलेश राणे यांची उपस्थिती
जयेश खांडगेपाटील : Navimumbailive.com@gmail.com
कणकवली : महिला बचतगटांना प्रोत्साहन देतानाच त्यांच्या उत्पादनांना हक्काची बाजारपेठ उपलब्ध करून देणे, हा महिला आर्थिक सक्षमीकरणाच्या दृष्टीने महत्त्वपूर्ण उपक्रम आहे. महिलांच्या कौशल्याला आणि कष्टांना व्यासपीठ मिळवून देणारा शिवसेनेचा बचतगट दीपावली महोत्सव हा उपक्रम निश्चितच कौतुकास्पद असल्याचे प्रतिपादन कुडाळ-मालवणचे आमदार नीलेश राणे यांनी केले.
शिवसेना कणकवली तालुक्याच्या वतीने आयोजित भव्य बचतगट दीपावली महोत्सव २०२६ ला आमदार नीलेश राणे यांनी भेट देत आयोजकांना शुभेच्छा दिल्या. यावेळी त्यांनी महिला बचतगटांच्या उपक्रमांची माहिती घेतली. बचतगटांच्या माध्यमातून महिला विविध प्रकारची उत्पादने तयार करून आर्थिकदृष्ट्या स्वावलंबी होण्यासाठी प्रयत्नशील आहेत. अशा महिलांना प्रदर्शन आणि विक्रीच्या माध्यमातून ग्राहकांपर्यंत पोहोचण्याची संधी मिळणे आवश्यक आहे. या महोत्सवामुळे महिलांच्या उत्पादनांना बाजारपेठ मिळण्यासोबतच त्यांच्या व्यवसायाला चालना मिळेल, असा विश्वास त्यांनी व्यक्त केला.
या प्रसंगी शिवसेना उपनेते संजय आंग्रे, तालुकाप्रमुख मंगेश गुरव, जिल्हा परिषद समाजकल्याण सभापती रुहिता तांबे, देवगड पंचायत समिती उपसभापती अमोल लोके, युवासेना जिल्हाप्रमुख विजय इंगळे, गुरुप्रसाद शिंदे, सुहास राऊत, मंगेश ब्रह्मदंडे यांच्यासह शिवसेनेचे पदाधिकारी, कार्यकर्ते आणि नागरिक मोठ्या संख्येने उपस्थित होते.
महिला बचतगटांच्या उत्पादनांना प्रोत्साहन देणाऱ्या आणि त्यांच्या आर्थिक स्वावलंबनाला बळ देणाऱ्या या महोत्सवाला उपस्थितांनी उत्स्फूर्त प्रतिसाद दिला.
