७४ आगींच्या घटनांनंतर महापालिकेचा कठोर निर्णय; ८ जानेवारी २०२७ पर्यंत प्रतिबंध
जीवन गव्हाणे : Navimumbailive.com@gmail.com
नवी मुंबई : दिवाळीत फटाक्यांमुळे घडलेल्या आगीच्या ७४ गंभीर घटनांची दखल घेत नवी मुंबई महापालिकेने हवेत उडणाऱ्या रॉकेट आणि तत्सम फटाक्यांच्या वापरावर कठोर बंदी घातली आहे. नागरिकांच्या जीवितासह सार्वजनिक व खासगी मालमत्तेची सुरक्षितता लक्षात घेऊन महापालिका आयुक्त तथा शहर आपत्ती व्यवस्थापन समितीचे अध्यक्ष डॉ. कैलास शिंदे यांनी हा प्रतिबंधात्मक आदेश जारी केला आहे. नियमांचे उल्लंघन करणाऱ्यांविरुद्ध थेट कायदेशीर कारवाई करण्यात येणार असल्याने रॉकेटबाजी करणाऱ्यांना चाप बसणार आहे.
९ नोव्हेंबर २०२६ रोजी मध्यरात्री १२.०१ वाजल्यापासून ८ जानेवारी २०२७ रोजी रात्री ११.५९ वाजेपर्यंत ही बंदी लागू राहणार आहे. सार्वजनिक व खासगी जागा, निवासी इमारतींच्या गच्च्या, बाल्कनी, आवारे तसेच निवासी परिसरातही रॉकेट आणि तत्सम उडत्या फटाक्यांना मनाई करण्यात आली आहे.
दिवाळीच्या काळात शहरात विविध ७४ ठिकाणी आगीच्या गंभीर घटना घडल्या. यामध्ये सार्वजनिक आणि खासगी मालमत्तेचे मोठे नुकसान झाले. काही नागरिकांकडून इमारतींच्या गच्च्यांवरून, बाल्कनीतून तसेच हातात धरून रॉकेट उडविण्याचे धोकादायक प्रकार समोर आले. अशा बेफिकीर कृत्यांमुळे आग लागण्याचा आणि जीवितहानी होण्याचा धोका वाढत असल्याने प्रशासनाने हा कठोर निर्णय घेतला आहे.
या आदेशाचे उल्लंघन करणाऱ्यांविरुद्ध आपत्ती व्यवस्थापन अधिनियम २००५ मधील कलम ५१ व ६० अन्वये कायदेशीर कारवाई केली जाणार आहे. दरम्यान, अन्य फटाके फोडण्यासाठी न्यायालयीन निर्देशांनुसार संध्याकाळी ७ ते रात्री १० हीच वेळ राहणार असून, त्यासाठी प्रचलित कायदे व सक्षम प्राधिकरणांचे आदेश पाळणे बंधनकारक असेल.
आदेशाच्या अंमलबजावणीसाठी यापूर्वी नियुक्त केलेली विशेष भरारी पथके लक्ष ठेवणार असून, संबंधित पोलीस अधिकारी, विभागप्रमुख, विभाग अधिकारी आणि अग्निशमन विभागावर अंमलबजावणीची जबाबदारी सोपविण्यात आली आहे. गृहनिर्माण संस्थांनीही आपल्या सभासदांना या बंदीची माहिती द्यावी, असे निर्देश देण्यात आले आहेत.
सुरक्षिततेशी तडजोड नाही, रॉकेटबाजीला थारा नाही, असा स्पष्ट संदेश देत महापालिका आयुक्तांनी नागरिकांना या आदेशाचे काटेकोर पालन करण्याचे आवाहन केले आहे.
