स्वयंम न्यूज ब्युरो : Navimumbailive.com@gmail.com
संपर्क : ८३६९९२४६४६ – ८४३३९८२१००
मुंबई : मराठी रंगभूमीवर आपल्या वेगळ्या कथानकाने आणि दमदार अभिनयाने प्रेक्षकांची पसंती मिळविणाऱ्या ‘सिरीयल किलर’ या नाटकाने १०० प्रयोगांचा महत्त्वपूर्ण टप्पा गाठला. दादर येथील ऐतिहासिक शिवाजी मंदिर येथे या शतकमहोत्सवी प्रयोगाचा सोहळा उत्साहात पार पडला. यावेळी राज्याचे कॅबिनेट मंत्री तथा सिंधुदुर्ग जिल्ह्याचे पालकमंत्री नितेश राणे प्रमुख पाहुणे म्हणून उपस्थित होते.
सिंधूसंकल्प एंटरटेनमेंट प्रा. लि. प्रस्तुत आणि प्रणय तेली निर्मित या नाटकाने आपल्या दर्जेदार सादरीकरणाच्या जोरावर प्रेक्षकांच्या मनात विशेष स्थान निर्माण केले आहे. १०० प्रयोगांचा टप्पा गाठणे ही संपूर्ण नाट्यसंघासाठी अभिमानास्पद आणि कौतुकास्पद बाब असल्याचे नितेश राणे यांनी यावेळी सांगितले.
एखादे नाटक शंभर प्रयोगांचा टप्पा यशस्वीपणे गाठते, त्यामागे कलाकारांचा कसदार अभिनय, दिग्दर्शकाचे कल्पक मार्गदर्शन, निर्मात्यांची मेहनत आणि पडद्यामागे कार्यरत असलेल्या प्रत्येकाचे योगदान महत्त्वाचे असते. अशा कलाकृतींमुळे मराठी रंगभूमीची समृद्ध परंपरा अधिक बळकट होत असल्याचेही त्यांनी नमूद केले.
यावेळी नाटकाचे दिग्दर्शक केदार देसाई, सुप्रसिद्ध अभिनेते भाऊ कदम, अभिनेत्री गायत्री दातार यांच्यासह संपूर्ण नाट्यसंघाची भेट घेऊन नितेश राणे यांनी त्यांच्या अभिनयाचे आणि कलात्मक योगदानाचे कौतुक केले.
शतकमहोत्सवी प्रयोगानिमित्त संपूर्ण नाट्यसंघाचे अभिनंदन करताना त्यांनी नाटकाच्या पुढील यशस्वी वाटचालीसाठी आणि आगामी प्रयोगांसाठी शुभेच्छा दिल्या. मराठी रंगभूमीवरील अशा यशस्वी नाट्यप्रयोगांमुळे नाट्यरसिकांना दर्जेदार मनोरंजनाची मेजवानी मिळत असल्याचे या सोहळ्याने पुन्हा अधोरेखित केले.