हवालदाराची तणावातून आत्महत्या

नवी मुंबई : वाकोला पोलिस ठाण्यात मानसिक तणाव आणि वरिष्ठांच्या छळाला कंटाळून एका पोलिस अधिकार्‍याने वरिष्ठ पोलिस अधिकार्‍याची गोळ्या घालून हत्या करून आत्महत्या केल्याची घटना ताजी असतानाच मुंबईतील आणखी एका हवालदाराने मानसिक तणावातून वाशी खाडीपुलावरून उडी घेऊन आत्महत्या केल्याची घटना समोर आली आहे.
कमलाकर धामणस्कर असे आत्महत्या केलेल्या पोलिस हवालदाराचे नाव आहे. धामणस्कर हे 2006 मध्ये मुंबई पोलिस दलात रुजू झाले होते. सध्या ते गोवंडी पोलिस ठाण्यात हवालदार म्हणून कार्यरत होते. वाशी खाडीपुलावरून उडी मारून त्यांनी आत्महत्या केली. रविवारी सकाळच्या सुमारास मच्छीमारांना त्यांचा मृतदेह आढळला. मच्छीमारांनी तत्काळ नियंत्रण कक्षाला माहिती दिली. त्यानुसार वाशी पोलिस घटनास्थळी पोहोचले. त्यांनी केलेल्या पाहणीत धामणस्कर यांच्या खिशात त्यांचे ओळखपत्र सापडले. त्यावरून त्यांची ओळख पटली. दरम्यान, धामणस्कर हे गेल्या काही दिवसांपासून मानसिक तणावाखाली होते, असे सांगण्यात येते. कौटुंबिक कारणामुळे त्यांनी आत्महत्या केल्याचेही बोलले जाते.